APRENE GALÒ A INTERNET
L’Institut del Galò, lenga d’oïl, parlada a l’èst del breton, a Nauta Bretanha, ven de confirmar que comencèt la promocion d’un cors per aprene aquela lenga de manièra gratuïta numerica. Per ansin, totes aqueles que vòlon aprene lo galò, la segonda lenga pròpria de Bretanha, amassa amb lo breton, pòdon ja o far a travèrs de Youtube, d’una manièra plan aisida e tanben gratis.
Aital, solament cal cercar aquela adreça numerica dins Youtube : https://bit.ly/3bzZxxI per trobar lo primièr cors en linha de l’Institut de Lenga Galò per totes e totas. Totun, se i aguèsse qualqu’un problèma per trobar lo cors tanben se pòt trapar en tot cercar amb las paraulas “aprendre le galò” en francés o “apprendre li gal”.
Lo cors, a l’ora d’ara, a ja tres leçons per assajar d’aver una lèu idèa sus l’istòria de la lenga galò e tanben trincar topics, coma aquel que ditz que lo galò es sonque un dialècte del francés e pro. Es pas aital, pr’amor que lo galò, es, òc una lenga plan pròcha al normand, e amb fòrça traches celtics, mas qu’a un vocabulari basicament latin diferenciat e que pendent l’edat medievala foguèt parlada mai enlà de Bretanha, car tanben se parlèt a Normandia, lo Mans e Maine.
Una bèla manièra d’espandir la lenga
Lo cors desvolòpa d’una manièra plan aisida ja durant la segonda leiçon los primièrs exercicis per far e las primièras paraulas de vocabulari en lenga galò, un vertadièr present e gratis, pels aimants de la cultura bretona mas tanben pels aimants de las lengas en general. De soslinhar que lo galò es una lenga pròpria totalament independenta del francés que ja foguèt reconeguda coma lenga regionala francesa en 2008.
Per ansin, lo galò, qu’es la soleta lenga d’oïl, considerada uèi lo jorn coma lenga regionala francesa, poirà se desvolopar plan amb l’ajuda de las nòvas tecnologias, una manièra de trabalhar que des de las revistas occitanas Sapiéncia e Medievalòc defensam fa temps. Amb lo començament d’aqueste cors sus la lenga galò en Internet e amb de vidèos, cal pensar que la lenga ganharà mai parlaires encara.
Cal remembrar que lo galò es una lenga que son nombre de parlaires es pas encara conegut de manièra drecha car i a d’estudis que situan la chifra en 200.000 personas (çò que seriá un 5% de la populacion de Bretanha) e d’autres que situan aquela chifra de parlaires en 30.000 (un 1% de la populacion bretona). Cossí siá, començar un cors a Youtube de lenga galò es una brilhanta idèa e que ne cal donar tot lo sosten possible.
La Redaccion
