TECNOLOGIA ENTÀ SAUVAR ERA NATURA
Ei un hèt non guaire conegut mès es scientifics e aimants dera natura de tot eth mon comencen a utilizar era tecnologia mès modèrna entà sauvar era fauna e flora dera planeta. Atau, usar dròns comença a èster mès e mès comun en diuèrsi pargues e reserves naturaus de toti es continents. Ei un arma fòrça utila entà trapar caçaires illegals e donar era alèrta entà arrestar-los dempús. E non sonque son utilizadi entà susvelhar, pr’amor que tanben ajuden fòrça es cercaires en diuèrsi trabalhs scientifics com contar especimèns o de còps enquia auer ADN des animaus sense herir era vida sauvatje.
Per ansin, mès e mès reserves naturaus africanes utilizen ja dròns entà susvelhar es territòris on ei proïbida era caça illegau, Es dròns mès modèrns tanben son utilizadi entà contar especimèns e poder atau confirmar era bona salut d’ua espècia o se aguesta a de besonh quicòm entà gésser d’ua situacion critica. Es dròns an camères entà trapar es caçadors illegals mès cau tostemps un uman entà reconéisher se i a ua vertadèra menaça laguens deth pargue naturau. Ara era sciéncia trabalha entà desvolopar IAs damb eth poder autonòm d’avisar era policia o era armada se trapen activitats sospechoses.
Era origina d’aguesta naua manèra de susvelhar es reserves naturaus comencèc quan diuèrsi estudiants de Tanzània volèren provar se es dròns podien reconéisher era sua preséncia “illegau” laguens ua reserva naturau. Era resulta der estudi siguec publicada online era annada passada. Es volontaris demorèren laguens eth territòri dera reserva e sajèren d’amagar-se darrèr des arbes mès eth dròn tostemps trapèc es umans. Es dròns utilizadi entà poder localizar-los auien camères pendent eth dia e detectors de calor pendent era net. E tostemps sigueren trapadi.
Era caça de caçadors illegaus
Dempús es direccions de diuèrses reserves naturaus africanes comencèren a usar aguesti dròns entà sauvar espècies critiques com rinocèros, elefants, audèths o encara diuèrses espècies de primats com chimpanzés o gorillas. A mès d’èster ua manèra naua e revolucionària d’estudiar de pròp aqueri animaus es dròns tanben ajudèren a trapar caçadors illegaus que jamès abans èren estats trapadi pes rangers d’aqueres reserves. E donques es dròns capitèren.
Totun, es cercaires tanben avertiren qu’era luta contra es caçadors illegaus non ei encara finida damb es dròns. Çò que cau ei hèr impossibla era venda de parts d’animaus mòrts en mercat dera planeta. E se açò non ei possible trapar un bon trabalh entar aguestes persones que hèn aguest comèrci illegau e que poirien víuer atau ben d’ua auta manèra. Mès entà hèr açò que cau hèr un gran esfòrç de toti es govèrns e administracions locaus dera planeta. E cau poder hè’c amassa.
D’un aute costat, es dròns tanben son mès e mès utilizadi entà contar especimèns d’espècies menaçades que demòren en airaus isoladi e fòrça aluenhats. E era utilizacion de camères entà estudiar aqueres espècies ei un hèt fòrça dificil. Totun, damb es dròns es cercaires pòden arribar a toti es lòcs que vòlen e descorbir atau animaus desconegudi.
Un aute gran problèma des cercaires ei tostemps eth prètz dera tecnologia usada entà trabalhar. En païsi on i a ua grana paubresa, utilizar era tecnologia actuau ei sovent fòrça dificil peth sòn prètz. Totun, es dròns son un des objèctes tecnologics actuaus mens cars, e era sua utilizacion pes cercaires ei venguda mès comuna pendent es darrères annades pr’amor deth son baish prètz. Entà estudiar es balenes en ocean per exemple, o encara entà contar quans pingüoins i a en ua isla dera Antartida.
Atau, era tecnologia mès modèrna non ei sonque un hèt dolent entara umanitat. Òm parla totjorn deth poder que pòt auer un dròn entà tuar ua persona en ua guèrra o com pòt hèr pérder eth lòc de trabalh un robòt a un uman. Mès com se debane sovent en tot çò creat pes umans, era tecnologia mès modèrna tanben pòt èster utilizada entà hèr causes bones, com protegir espècies viues dera planeta fòrça menaçades, o susvelhar des deth cèu es reserves naturaus on es totauments proïbit caçar animaus. Pr’amor qu’era tecnologia, com er òme, non ei dolenta per era madeisha mès era sua utilizacion ei çò que pòt èser bon o dolent. Com er èster uman.
Era Redaccion
