Víver dens lo conegut sistèma capitalista qu’a, sovent, deus efèits positius, mes tanben negatius, sus la fauna e la flora que i a en la nosta tor. E las caracteristicas d’aqueth sistèma que son patidas per tots, tanben los asimants de la natura, los ecològs e los cercaires. Uei coneisserèm çò que pòt passar a ua bòira de rinocèros africana dab un futur briga clar. E tot, pr’amor deu sistèma capitalista.
En Africa deu Sud que i a ua bòira de rincocèros. Lo son proprietàri qu’ei l’asimant de la natura, John Humes, hèra conegut dens aqueth país. La bòira, uei, a dejà ua istòria de mei de 30 annadas e la populacion de rinocèros, urosament, que creishó e que creishó plan pr’amor de la hauta proteccion deus mamifèrs dens la bòira.
Mes qu’ei l’escaduda deus rinocèros çò que provoquè la soa venta. Pr’amor qu’uei dejà i a mei de 2.000 rinocèros dens la bòira e lo proprietàri, ne pòt pas mei balhar de neuritud aus mamifèrs pr’amor deu haut còst de la medisha uei. « Que son mei de cinc milions de dòlars annaus, dit John Hume, triste, pr’amor qu’ei un defensor gran deus rinocèros. E ne pòdi pas mei dab la bòira ».
John Hume, lo proprietàri de la bòira de rinocèros, que decidí protegir los rinocèros mei de 30 annadas a, e qu’auherí proteccion e neuritud als rinocèros, e, aqueths, dens ua savana privada, que comencèn a se reprodusir. A l’epòca pas dengun pensava qu’aqueth endret veneré Platinum Rhino, la màger resèrva de rinocèros deu monde.
John Hume qu’usè mei de 100 milions de dòlars au long de trenta annadas entà protegir e neurir aqueres rinocèros. Mes uei n’a pas mei argent e cau véner la resèrva. Segon paraulas de Hume, uèi solament a 2.000 rinocèros e 8.000 ectaras de tèrra. E Hume a 81 annadas, e ne pòt pas mei contunhar la luta entà la proteccion animau.
Un sistèma economic mondiau
Lo sistèma capitalista qu’obliga a véner se òm pòt pas escàder. Ara Hume cèrca ua persona que posca crompar la bòira dab los rinocèros. Aquera persona déu estar un asimant deus animaus, pr’amor que cau contunhar lo projècte de reproduccion dels rinocèros. Lo prètz de sortida de la bòira que son 10 milions de dòlars.
La bòira comencè dab solament 130 rinocèros e despuish 2007 que comencè a patir l’ataca deus braconaires. Que caló bastir de barrats, de cameras e deus policièrs privats per potegir la bòira e los rinocèros. La bòira qu’ei situada a 200 km d’ua vila grana, Johannesborg, e calèva un sistèma policièr pròpri entà susvelhar los rinocèros 24 òras quotidianas se se volèva empachar l’ataca deus braconaires.
Solament en 2022 qu’estón aucits 450 rinocèros peus braconaires en Africa deu Sud. Hume, totun, ne pòt pas mei economicament dab aquera bòira. Qu’ei urós, pr’amor qu’adara i a mei rinocèros en la planeta que quan la bòira comencè, 30 annadas a. Totun, daubuas associacions ecologistas africanas que critiquèn l’existéncia de la bòira, pr’amor que disen que los mamifèrs deven demorar liures e pas barrats. Pr’amor que ne balhan pas nat benefici a l’environament .
La venta qu’ei dejà començada, e adara cau conéisher qui serà la persona o enterpresa que cromparà la bòira. Pr’amor deu sistèma capitalista e pas umanista que demoram uei. Mes lo futur de la bòira e dels mei de 2.000 rinocèros ne demora pas briga clar, pr’amor que poiré estar que sia crompada per ua associacion ecologista que poiré puish liberar los rinocèros. E que seré un gran dangèr entaus animaus pr’amor deus braconaires. Tanben poiré estar crompada per ua enterpresa privada de caça e los rinocèros que poirén estar puish caçats de faiçon legau.
E tot pr’amor qu’arrés n’ajudè pas dab argent John Hume, l’asimant deus rinocèros. Pr’amor que lo sistèma economic actuau ei çò qui dirigeish la nosta societat, e tanben lo monde de la fauna e la flora mondiau. O cambiar o pas qu’ei la nosta obligacion. E, dilhèu mei de 2.000 rinocèros, ua espècia mamifèra plan miaçada uei, pòt ajudar a har cambiar la pensada e cercar un sistèma mei juste entà tots, umans e animaus e plantas.
La Redaccion
