![ETH COCHE DETH FUTUR](https://sapiencia.eu/wp-content/uploads/2020/04/coche3.jpg)
ETH COCHE DETH FUTUR
Maugrat qu’encara manque temps, semble èster qu’eth coche autonòm, tanben nomentat coche automatizat, serà eth coche deth futur. E tot açò tanben maugrat era pòur instintiua que totes n’auem: 73% des persones aurien fòrça pòur d’èster laguens d’un coche autonòm, 63 % des ciclistes non aimen aguest tipe de coches e 45% des persones non vòlen comprar jamès un coche automatizat. Totun, que ja non ei mès un hèt de sciéncia-ficcion e ja ei aciu. Eth coche deth futur ja ei entre nosati.
![](https://sapiencia.eu/wp-content/uploads/2020/04/coche1.jpg)
Segontes diferentes enquestes hètes a nivèu mondiau se pense qu’es coches autonòms poirien èster eth 20% (o mès) des coches que i a ena planeta (au mens en Occident). Atau se pense que, maugrat qu’en 2020 solament son mens deth 0,5% des coches que i a en mon, açò poirie cambiar lèu pr’amor qu’en 2025 es coches automatizadi ja poirien èster enquiath 7,5% de toti es coches dera planeta. Pr’açò cau encara auer ua naua tecnologia e, sustot, es leis necessàries enta permete’c. Se non, diden es fabricants de coches autonòms, en 2030 aguest tipe de coches solament arribarà ath 10%.
Ua realitat lonhana
Encara aué non se poden veir coches automatizadi 100% en carretères: N’i a fòrça que ja an, totun, un cèrt) tipe d’automatizacion, mès que mès, de nivèu 2 (un tipe de coches que solament an ua sòrta de foncions automatizades com era acceleracion e era direcccion e pro). Es persones deuen tostemps ajudar encara en trabalhs com era direccion, eth frèn o era acceleracion.
Aguesti son, aué, es solets tipes de coches semiatonòms que i a en carretères. N’i a mens deth nivèu 3 (damb mès autonomia mès qu’era persona a de vigilar tostemps eth sòn entorn). Era clau de tot, çò diden es expèrts, ei quan arribaràn es coches de nivèu 4 (era conduccion ei totauments automatica e eth conductor pòt encara conduir s’ac vò). E se pense qu’aguest tipe de coches seràn fòrça desvolopadi ja pendent era dècada de 2020 e començaràn tanben a arribar as carretères de tota era planeta.
Maugrat qu’es expèrts confirmen qu’encara passarà ua auta dècada entà arribar as coches autonòms de nivèu 5 (automatizacion totau) encara non i a ua decision unanima sus quan se passarà açò. E aguest hèt dilhèu a quauqu’ua causa a veir damb era pòur qu’encar an (auem) es umans as coches automatizadi 100%.
![](https://sapiencia.eu/wp-content/uploads/2020/04/cohce2-300x230.jpg)
Diuèrsi estudi demostren, totun, qu’era conduccion autonòma ei fòrça mès segura qu’era conduccion umana: 94% des accidents grèus an com causa errors umans segontes eth govèrn estatsunitenc e damb era automatizacion des coches tanben i aurà mens CO2 en carretères, mens coches e mens accidents.
Mès era pòur ei instintiua. Quan ua hemna moriguec pr’amor que siguec trucada per un coche automatizat en Arizòna en 2018, totes digueren qu’ère normau. Maugrat que crosèc era carretera de net, damb ua bicicleta e on non se podie hèr. Eth coche, propietat d’Uber, identifiquèc ara hemna prumèr com un objècte desconeishut, dempús com un veïcúl e, fin finau, com ua bicicleta. 1,3 segontes abans deth truc eth sistèma demandèc un frèn d’urgencia. Era persona que i ère laguens ac hèc 1 segon abans e comencèc a frenar eth veïcúl dempús deth truc. Segontes diuèrsi engenhaires, damb ua persona aurie passat çò de madeish.
Era polemica ei grana encara aué. Pr’amor qu’ei ua tecnologia qu’es umans n’auèm pòur). Totun, qu’eth temps entara arribada deth coche autonòm, eth coche deth futur, ei aué mès e mès redusit, maugrat era nòsta pòur instintiua.
Era Redaccion*
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita