LA NAU ESPACIALA ENDEVOUR TORNÈT PLAN A LA TÈRRA
Dins la nau d’Space X del tipe Crew Dragon i avián dos astronautas de la NASA, Bob Behnken e Doug Hurley, que poguèron sortir plan de la nau dempús de la casuda projectada al Gòlf de Mèxic dimenge passat. Los astronautas tornavan de l’Estacion Internacionala Espaciala (EEI) e demostrèron que l’entrepresa comerciala Space X pòt començar ara amb la sieuna tòca, çò es, far de torisme espacial.
“Felicitacions a la NASA e las còlas tecnicas d’Space X, que faguèron possible aquel viatge espacial, çò diguèt l’administrator de la NASA Jim Bridenstine. Es un fach que quand trabalham amassa tot pòt èsser fach. E viatjar fins a Mart e la Luna serà una tòca que sonque podèm complir se trabalham aital, çò es amassa”.
La nau espacial d’Space X Demo-2 sortiguèt de la Tèrra lo passat 30 de mai e quan lors astronautas èran prèp de l’EEI cambièron lo nom de la nau pel d’Endevour. Aquela nau arribèt a l’EEI sonque 19 oras pus tard. Los astronautas, Behnken e Hurley, ja avián participat en un sens fin d’experiments espacials abans dont 64 jorns a l’espaci, 1024 orbitas al torn de la Tèrra e tanben avián fach amassa mai de 42 milions de quilomètres dins una autra nau espaciala. E dimenge passat tornèron plan a la Tèrra.
La quita NASA confirmèt que la tòca de la NASA mas atanben d’Space X èra poder mesurar se los viatges comercials e toristics a la Luna se podián far e quant podián costar economicament. Pr’açò envièron l’Endevour a l’EEI: caliá ganhar de temps per veire se lo viatge èra pas car. Mai tard, çò apondèron de fònts oficialas de la NASA la tòca es enviar d’astronautas a Mart.
La redaccion
