LAS PLUMAS ARRIBÈRON ABANS QUE LOS AUCÈLS
Una nòva e estonanta recerca realizada per l’Universitat de Bristol afirmèt que las plumas apareguèron 100 milions d’ans abans que los aucèls. Aquò es un nòu vejaire que pòt cambiar totalament l’idèa qu’avèm dels dinosaures, los aucèls e atanben los pterosaures.
La clau per aquesta descobèrta arribèt ongan, quora foguèt confirmat paleontologicament que los pterosaures aguèron de plumas. E se aquestes aguèron de plumas, aquò vòl dire qu’aquelas aguèron una origina plan mai anciana que lo dels quites aucèls.
Aital, Mike Benton, de l’Escòla de Sciéncias de la Tèrra, de l’Universitat de Bristol, confirmèt que l’aucèl mai ancian jamai trapat es Archaeopteryx (trobada en 1861) mas que divèrsas espècias trapadas en China son encara mai vielhas.
“Son de fossils qu’an totes de plumas al long del cors e las alas, çò diguèt Benton. En mai d’aquò, dempuèi 1994 los paleontològs an assajat de descobrir se los recents dinosaures trapats en China atanben avián de plumas. Baoyu Jiang, de l’Universitat de Nanjing, d’un autre costat, confirmèt que “los primièrs dinosaures amb de plumas son pròches a l’origina de las aus. Foguèt malaisit de creire pr’amor que l’origina de las plòmas arribèt als 200 milions d’annadas”.
E arribèt Kulindadromeus
Segon Maria McNamara, autora atanben del nòu estudi, confirmèt que tot aquò cambièt amb la tròba d’un nòu dinosaure a Russia, Kulindadromeus, qu’atanben aguèt de plumas. E coma qu’èra luenh evolutivament dels aucèls caliá pensar se los primièrs dinosaures atanplan aguèron de plumas.
Dos pterosaures mai, trobats en China, ajudèron encara mai a l’ora de desvolopar aquela idèa: “Fòrça pterosaures atanben avián de plumas, çò confirmèt Baoyu Jian. E aquò situa l’origina de las plumas a un moment que se passèt fa 250 milions d’annadas, au mens”.
Alavetz, l’origina dels pterosaure e dinosaures, pendent lo Triassic, foguèt un moment clau. E cal desbrembar pas que los mamifèrs de l’epòca ja avián de pel. E ara los paleontològs creson que los dinosaures, los pterosaures e lors ancessors ja avián de plumas. Foguèt, dison, una manièra de se protegir del clima. Apuèi venguèt la foncion de la pluma per volar. L’estudi foguèt publicat al numeric Trends of Ecology&Evolution.
La Redaccion
