Quand ausissèm de sons rars o de fiuladas dins l’aurelha, pensam que, benlèu, es un fach pauc comun, mas un darrièr estudi demòstra que sus la planeta i a mai de 120 milions de personas que patisson de fiuladas dins l’ausida. Aquò entraïna que fins al 14% de la populacion mondiala patís o a patit de talas fiuladas. Es un fenomèn doncas qu’es relativament frequent.
Es la resulta d’un estudi realizat per de cercaires europèus e qu’aviá coma tòca d’analisar lo fenomèn dels acofèns, tanben coneguts amb lo nom latin de tinnitus. L’estudi foguèt publicat dins lo numeric JAMA Neurology e demòstra, pasmens, qu’es un fenomèn mai desvolopat amb l’edat e que i a pas de grandas diferéncias sexualas. Totun, los acofèns son patits de biais diferent segon lo continent.
Las fiuladas dins l’ausida pòdon èsser un senhal de quicòm pus grèu e pòdon arribar en causa d’una lesion, d’estransi de l’ausida o encara d’una patologia mai grèva, coma un cancèr. E, sens saber encara quina es lor origina, los scientifics an volgut trapar quantas personas patissián aquel fenomèn.
Segon Carlotta Micaela Jarach, de l’Institut Mario Negri de Milan, “un adulte sus sèt es victima de tinnitus grèus. E aquò vòl dire qu’aperaquí lo 2% de la populacion mondiala o mai de 120 milions de personas patís de fiuladas. E, de còps, aquestas finisson pas jamai”.
Pasmens, es pas una resulta definitiva, e los cercaires demandan ara de poder far mai d’estudis sus aquel fenomèn doncas corrent dins la societat actuala. Es plan malaisit de trapar quora una persona subís aquel fenomèn qu’arriba abans la pèrda totala de l’ausida, tanben coneguda amb lo nom d’ipoacosia. E se pòt trapar las personas que lo patisson mas se pòt pas encara enregistrar las fiuladas per las estudiar.
Un percentatge pro naut
Segon l’estudi, fins al 14,4% dels adultes son estats victimas de tinnitus. Se son pas adultes, lo percentatge arriba sonque al 13,6%. Mas son pas de chifras definitivas. Se lo nombre de menors foguèsse corrècte, cal apondre encara 325 milions de mai de personas expausadas a aquel fenomèn dins lo Mond. Mas las chifras suls menors son pas brica seguras, çò apondèron los quites cercaires.
“I a de mai en mai de tinnitus amb l’edat a l’epòca actuala, aquò es segur, çò diguèt Berthold Langguth, de l’Universitat de Ratisbona. Segon l’estudi, lo 9,7% dels joves (entre 18 e 44 ans) subisson de fiuladas dins l’aurelha, lo 13,7% quand tenon entre 44 e 65 ans, e lo percentatge arriba al 23,6% quand las personas tenon mai de 65 ans. Mas i a pas gaire de diferéncias segon lo sèxe”.
Segon la mapa del Mond, Asia, Oceania, l’America del Nòrd e Euròpa an de percentatges semblables, entre un 16% e un 13%. Pasmens, las donadas d’America del Sud e d’Africa son plan desparièras car fins al 21,9% dels sud-americans patisson aquel fenomèn mas sonque lo 5,2% dels africans, de nivèls que los cercaires pòdon pas encara explicar. Cossí que siá, patir de fiuladas dins l’ausida es un fenomèn que coneis pas l’argent, pr’amor que las chifras càmbian pas se la persona afectada es rica o paura.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
