Home DIVÈRSES MAI DE CALOR DINS LOS PAÏSES MAI PAURES
MAI DE CALOR DINS LOS PAÏSES MAI PAURES
0

MAI DE CALOR DINS LOS PAÏSES MAI PAURES

0

La pollucion provocada pels païses mai industrialitzats provòca lo cambiament environamental de la Tèrra. E seràn, malgrat aquò, los païses mai paures de la planeta que coneisseràn una pojada màger de la temperatura. Ironic mas real. Aital o afirma un nòu estudi scientific après estudiar las temperaturas mejanas de la Tèrra fins en l’an 2100.

Lo nòu estudi, fach per de cercaires de las universitats de Montpelhièr, Exeter e Wageningen, a volgut soslinhar que las consequéncias dirèctas de la montada avenidoira de las temperaturas al nivèl global las patiràn los païses que produson mens de pollucion, çò es los païses mai paures de la planeta.

Los païses qu’an mens provocat aquela situacion serànque patiràn las mai grandas montadas de temperatura.

Segon aqueste estudi, per cada gra d’escalfament global que lo patirà la planeta dempuèi nòstra epòca fins en l’an 2100, la temperatura serà de fins a un 15% mai nauta dins lo sud african e en Amazonia. A mai, tanben serà fins a un 10% mai nauta dins los païses del dich Sahèl, en Índia e dins lo Sud-Èst asiatic.

Del temps qu’aquò aven, çò ditz l’estudi, los païses que son pas situats a l’airal tropical, çò es los mai rics de la planeta, veirem cossí la temperatura tomba. Segon los cercaires qu’an fach l’estudi, aquò serà una consequéncia dirècta de la pollucion qu’aqueles païses produson dempuèi 1950.

De cercaires occitans

Los cercaires occitans qu’an participat a aquel estudi de l’Universitat de Montpelhièr tanben se son volguts mostrar inquiets per las resultas del temps qu’an confirmat las dificultats rescontradas per far de projeccions futuras sus lo clima que i aurà a la planeta los ans venents. Çò de mai malaisit, çò volguèron soslinhar, foguèt de predire quora i aurà d’ondas de calor o un clima mai freg.

“Los païses qu’an mai provocat lo cambiament enrironamental, çò es los païses mai industrialitzats e a l’encòp los mai rics –çò diguèt Sebastian Bathiany, de l’Universitat de Waningen– son los ont se desvoloparàn mens los efièches de la temperatura. Al còp, los païses qu’an mens provocat aquela situacion e los que pòdon mens luchar contra ela seràn los que patiràn las mai grandas montadas de temperatura”.

Seràn los païses mai paures de la planeta que coneisseràn una pojada màger de la temperatura.

A mai, Tim Lenton, de l’Universitat d’Exeter, apond que los “païses que patiràn lèu las mai nautas temperaturas son tanplan los païses ont i a mai de populacion e tanben los païses ont i a mai de populacion ansin coma los païses ont l’indici de creissença de populacion es lo mai naut de la planeta”.

Aital, los cercaires occitans, angleses e neerlandeses an confirmat que la resulta de l’estudi es una marrida nòva per las societats e ecosistèmas tropicals “pr’amor que seràn los que patiràn mai los efièches de la calor”. En mai d’aquò, las conclusions de l’estudi afirman que los cambiaments e pojadas de temperatura son totalament associats a de secadas e de carestiás de noiridura e d’aiga.

Per efectuar l’estudi, la còla de cercaires a analisat fins a 37 modèls desparièrs utilizats dins lo darrièr rapòrt del Panèl Intergovernamental sul Cambiament Environamental (IPPC, segon la sigla anglesa). De soslinhar que, malgrat que la creissença avenidoira de temperaturas sus la planeta siá estada fòrça estudiada scientificament, pauques cercaires an sonat l’alarma sus l’impacte qu’ aurà sus las societats umanas de la Tèrra.

La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.