Francesc Sangar.-. Quina monarca foguèt considerada coma “la mairegranda” d’Euròpa? La Reina Victòria d’Anglatèrra. E perqué? Pr’amor que la siuena granda descendéncia (nòu filhs) arribèt a la majoritat dels tròns europèus mejançant de matrimònis amb d’autres linhatges monarquics, abitualament a travèrs dels sieus felens. Aqueles maridatges èran utilizats per establir d’alianças diplomaticas amb los autres reialmes. La meteissa reina s’èra maridada amb Albert de Saxònia-Coburg, una union que jonhiá amb lo jove Reialme dels Bèlgas, e convertissiá Belgica en una aliada de Grand Bretanha.
De familha alemanda
La primièra filha, tanben Victòria, se maridèt amb lo prince Frederic de Prússia, qui vendriá brèvament l’emperaire Frederic IIIn d’Alemanha. Podèm detectar un clar interès per emparentar amb de familhas nòblas alemandas, benlèu per las originas de la meteissa reina britanica o de la familha del sieu marit.
La siuena felena Alexandra, de la siuena filha Alícia, foguèt la darrièra emperairitz de Russia, maridada amb lo tsar Nicolau II. E la siuena autra felena Victòria Eugènia de Battemberg, foguèt reina d’Espanha pel sieu maridatge amb Anfós XIIIn. Lo sieu filh Arthur foguèt ancessor de la reina Margarida IIa de Dinamarca e del rei Carles XVIn Gustau de Suècia.
Lo listat de membres de las coronas europèas emparentats amb la reina Victòria es enòrme, s’apondèm de personas qu’integrarián pas lo nuclèu central de las monarquias (cosins, nebots, autres filhs de monarcas…). Cossí podèm veire, tot un arbre de genealogia qu’emparentava totas las dinastias reialas europèas, mas que foguèt pas util per evitar de grandas tragèdias coma la Primièra Guèrra Mondiala. Podián aqueles ostals reials aver intervengut per causa de la proximitat familiala per resòlvre los problèmas en utilizant la via diplomatica?
Aquelas relacions familialas provoquèron tanben l’aparicion de l’emofilia, una malautiá qu’abitualament solament patisson los òmes, e que foguèt transmesa a desparièras dinastias reialas europèas. L’eretièr del tròn rus, lo tsarevic Alexei o qualqu’unes dels filhs del rei Anfós XIIIn d’Espanha patiguèron aquela malautiá, transmesa a qualques descendents de la reina Victòria d’Anglatèrra.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
