![ISTÒRIA DE LA VIDA (17), TANBEN DICHA EVOLUCION](https://sapiencia.eu/wp-content/uploads/2020/11/pliocen-1-2.jpg)
ISTÒRIA DE LA VIDA (17), TANBEN DICHA EVOLUCION
Lo Pliocèn foguèt una edat geologica diferenta a l’actuala mas foguèt tan pròcha qu’òm poiriá arribar a dire que, geologicament, aquela edat, que se debanèt entre ara fa 5 e sonque 2 milions d’ans, foguèt parièra a l’edat actuala. Pasmens las màgers diferéncias foguèron a nivèl etologic (fauna) e pas gaire de vegetacion.
![](https://sapiencia.eu/wp-content/uploads/2020/11/pliocen-2.jpg)
Per ansin, çò qu’es segur es que lo glaç de l’emisfèri nòrd s’espandiguèt pertot. E, doncas, a mai de l’Antartida, que i aviá fòrça mai glaç, sustot a l’emisfèri pus septentrional. Tot aquel glaç entraïnèt mai freg encara e la majoritat dels boscatges desapareguèron. E de prats d’èrba s’espandiguèron encara mai pertot.
Malgrat que foguèt una edat que la planeta èra de mai en mai pròcha a l’epòca actuala, i aviá de senhals que soslinhavan de grandas diferéncias; sens cap espècia umana encara a la Tèrra; lo mond èra plen de mamifèrs, mai que mai erbivòrs: de bòvids, de cèrvis, de gasèlas, d’antilòps e de cavals (benlèu cal dire melhor d’ancessors dels cavals, coma Pliohippus). Tanben de camèls, de mastodonts e de girafas de còl cuèrt. Totes demoravan en de tropelats de milions d’especimèns en Africa e America del Nòrd mas tanben en Euròpa.
Lo Pliocèn foguèt l’epòca de la naissença d’una espècia mamifèra plan celèbra uèi lo jorn: los ipopotams o melhor lors ancessors. D’efièch, los primièrs ipopotams foguèron trapats a la selva de mai d’un continent. Lors ancessors pus ancians èran… de pòrcs (o d’animals de la quita familha, çò es de suids). Uèi, totun, sonque demòran doas espècias d’ipopotams e alavetz n’i aviá fins a uèch. Pichonas mas importantas diferéncias que donan de caracteristicas pròprias a aquela edat.
Los tropelats d’ervibòrs (que n’i aviá milions) creèron pus senhals d’alèrta per s’avisar de l’ataca dels predators. Mas aqueles tanben evolucionèron, e plan. Lor velocitat venguèt màger e fòrça predators aprenguèron a caçar tanben en tropel, coma canids e felids. Per ansin, podián arribar a caçar d’animals fins a dètz còps mai grosses qu’eles, come fan uèi lo jorn de predators africans coma los licaons.
![](https://sapiencia.eu/wp-content/uploads/2020/11/pliocen-3-300x216.jpg)
Lo gregarisme venguèt tanplan mai important per aqueles predators car caçar en tropèl èra totalament desparièr de çò qu’avián fach fins alara e sonque podián èsser d’animals mai socials se volián subreviure en tropel (e coma espècia). Dins un tropel o comunautat animala totes coneisson lor luòc e l’interès del grop demòra sus d’autres possibles interesses particulars. Caçar en grop es la tòca d’una còla e totes devon seguir lo cap del tropelat.
America del Sud
Aprés milions d’annadas d’isolament l’America meridionala tornèt a s’amassar amb l’America del Nòrd a travèrs d’un pònt de tèrra. D’animals tras que singulars coma d’armadillos, de peresoses, d’orses formiguièrs e de toxodons agachèron l’arribada de fòrça autras nòvas espècias. Aquò tanben ajudèt aquelas espècias pus meridionalas a emigrar vèrs lo nòrd.
Atanben arribèron d’ancessors de cavals, de rats e d’elefantids. La concurrència cresquèt plan e aquò, amassa amb lo cambiament de cèrtas condicions climaticas pendent la fin del Pliocèn tanben entraïnèt l’extincion de plusors espècias qu’uèi existisson pas pus. Lo mond, totun, començava a semblar mai e mai la planeta actuala ont demoram. Emai lo clima foguèsse fòrça pus freg.
La Redaccion