La confirmacion de l’edat d’un cran en Grècia en 1978 farà cambiar tot çò que se sabiá sus la nòstra espècia, sustot en Euròpa. Aital, lo cran nomentat Apidima 1 seriá d’un tras qu’ancian Homo sapiens. Segon aquò, la nòstra espècia auriá arribat a Euròpa fa 210.000 annadas, s’escantilhèt e apuèi i serián arribats los neandertalians. Una istòria que cambiarà totalament lo vejaire qu’avèm uèi lo jorn sus aquela epòca.
Lo cran d’Apidima 1 es l’exemple mai ancian d’un especimèn d’Homo sapiens descobèrt defòra Africa. E situa l’arribada de la nòstra espècia al continent europèu 150.000 ans abans. Lo cran foguèt trapat a la cauna grèga d’Apidima, al costat del cran nomentat Apidima 2 fa mai de 40 ans. Mas la sieuna edat es estada confirmada ongan.
L’estudi del cran foguèt realizat pel Centre Senckenberg d’Evolucion Umana e Paleoenvironament de l’Universitat de Tübingen e confirmariá qu’au mens ja al Pleistocèu Mièg i aurián doas espècias omininas al sud de Grècia de neandertalians mas atanben d’ancians Homo sapiens. E los neandertalians serián posteriors als Homo sapiens, çò confirmèt Keterina Harvati, d’aquela universitat.
Aital, e maugrat que los crans fossils d’Apidima 1 e Apidima 2 foguèron descobèrts en 1978, una còla de cercaires e Harvati tornèron estudiar aqueles especimèns fossils amb de metòdes radiometrics : Apidima 2 èra lo cran d’un neandertalian que demorèt en la cauna fa 170.000 ans. Mas alavetz venguèt la suspresa: Apidima 1 èra lo cran d’un Homo sapiens qu’aviá demorat a la quita cauna fa 210.000 annadas.
Una tròba estonanta
Segon la còla de cercaires qu’estudièt aqueles crans Apidima 1 a pas de caracteristicas neandertalianas e sembla qu’a de traches umans modèrns barrejats amb de caracteristicas pus primitivas, çò que fa pensar qu’es lo cran d’un tras qu’ancian Homo sapiens. La tròba balhariá supòrt a l’ipotèsi paleoantropologica qu’afirma qu’Homo sapiens sortiguèt d’Africa mai d’un còp e qu’auriá arribat a divèrses luòcs defòra d’Africa e entre aqueles Euròpa.
“L’especimèn d’Apidima 1 es 150.000 ans pus ancian que quinsevolh autre especimèn uman modèrn jamai trapat a Euròpa fins uèi lo jorn, çò confirmèt Harvati. Pr’aquò cresèm plan l’ipotèsi qu’afirma que, en Euròpa, coma se passèt al Pròche Orient, de populacions ancianas d’òmes modèrns foguèron remplaçats per d’autras populacions neandertalianas. Lo cran d’Apidima 1 ne seriá un bèl exemple”.
La confirmacion de l’edat del cran d’Apidima 1 en Grècia entraïna un cambiament radical del vejaire qu’avèm fins uèi lo jorn sus la nòstra espècia. La sciéncia sonque aviá podut confirmar la preséncia de la nòstra espècia en Euròpa fins fa 40.000 ans e pro. E quora aquò se debanèt comencèt l’extincion finala dels neandertalians al continent europèu.
“Totun, los neandertalians atanben cerquèron un luòc en Grècia, çò diguèt Harvati. E la tròba del cran d’Apidima 2, lo cran d’un neandertalians posterior a Apidima 1 fa creire que los neandertalians demorèron al sud de Grècia temps apuèi que i èra demorada una populacion d’umans modèrns”. Una descobèrta, d’efièch, totalament revolucionària.
La Redaccion
