Son estadas trobadas divèrsas puntas d’abans de l’epòca de Clovis, la primièra cultura paleolitica d’America del Nòrd. La tròba es considerada tras qu’estonanta pr’amor que fins ara solament èran estadas encontradas de puntas de la cultura de Clovis coma las mai ancianas d’aquel continent. Ara cal revisar tota la preïstòria d’America.
Lo centre qu’a fach publica aquela descobèrta, lo centre arqueologic de Gault, en Tèxas, ja a confirmat que las puntas encontradas apertenon a una cultura tecnologica anteriora a Clovis pr’amor que pòdon èsser classadas entre 16.000 e 22.000 annadas d’edat. Segon aquò, Clovis a daissat d’èsser la primièra cultura preïstorica americana – qu’aviá classat la punta mai anciana amb 11.000 ans.
Atal e pendent decadas, los scientifics an afirmat qu’America del Nòrd foguèt poblada fa solament 13.500 ans, lo meteis temps qu’an las primièras puntas de lança per caçar de la nomentada cultura de Clovis. Mas que totjorn an sabut pas respondre la question sus perqué Austràlia foguèt poblada fa 40.000 annadas e America pas alara ?
Ara totun, plusors cercaires de l’Universitat Estatala de Tèxas que trabalhavan al siti arqueologic de Gault, al nòrd-oèst de la vila d’Austin, an confirmat la datacion de divèrses esplèches de pèira qu’an una edat pròcha als 22.000 ans. Aquò situa l’arribada de la nòstra espècia a aquel continent fòrça abans que non se cresiá.
La teoria de “Clovis Primièr” desfacha
“Los espleches encontrats de la cultura de Clovis fins ara son plan particulars e foguèron trobats a Clovis, Nòu Mexic, en las annadas 1920 – çò diguèt Thomas Williams, d’aquela universitat texana -. Dempuèi alavetz es estat afirmat que los primièrs umans qu’arribèron a America foguèron los de la cultura preïstorica de Clovis e que n’i aguèt pas cap abans. Aquò ara es estat demostrat qu’èra pas vertadièr”.
Segon los recercaires qu’an analizat aquelas nòvas puntas, ara descobèrtas, e nomentadas coma puntas de Gault, son unicas e n’i a pas cap de parièra en tot America. Aquò dubrís una fantastica pòrta a l’estudi dels primièrs umans qu’arribèron al continent american, fòrça abans doncas d’aquela epòca.
A mai, las excavacions a Gault an balhat de pichonas puntas de pèira, de bifaces e d’autres espleches, plan ben documentats estratigraficament. Segon la còla qu’a trobat las puntas, son fòrça parièras a las de Clovis mas anterioras pr’amor que foguèron encontradas dins un nivèl inferior. “Çò qu’es segur es que son pas de puntas de Clovis, çò diguèron los arqueològs”.
La tecnologia de la luminiscéncia donèt una edat situada entre fa 16.000 e 22.000 annadas. Segon los arqueològs Gault seriá estada una val ont s’amassavan d’umans pr’amor de la fauna abondiva que i aviá a l’epòca. Atanben i aviá d’aiga per d’umans e d’animals pendent las sequèras e aquò explicariá ben la tròba.
Ara cal situar l’arribada de la nòstra espècia a America del Nòrd 2.500 annadas abans que çò qu’avèm afirmat totjorn los arqueològs – çò afirmèt Williams -. E segon sembla la cultura de Clovis seriá espandida sus una autra cultura indigèna tanplan fòrça espandida e ben establida al luòc”. L’estudi que ne parla es estat publicat al numeric Science Advances.
La Redaccion
