Son estats trobats sus d’inscripcions sus una ròca desconeguda fins ara. Son d’ieroglifes qu’an una edat de 5200 ans e son estats descobèrts dins lo sit arqueologic egipcian d’El Khawy, prèp de l’anciana vila egipciana d’Elwab. Segon la còla internacionala d’arqueològs qu’a fach la trobalha, serián benlèu los ieroglifes mai ancians e mai grands jamai trobats fins a uèi lo jorn en aquel país.
Las inscripcions pòrtan divèrses signes. Entre eles l’imatge d’un cap de buòu sus un pal, doas entòrchas e un aucèl ibis en naut de tot. Aquò seriá, segon los arqueològs, un simbòl que foguèt mai tard representat en Egipte anciana coma lo cicle solar e lo concèpte de luminositat.
“Son los ieroglifes mai ancians e mai grands jamai trobats en Egipte, amb de simbòls que balhan una evidéncia clara sus cossí foguèt creat lo sistèma d’escritura de l’Egipte anciana, çò diguèt John Coleman Darnell, professor del Departament de Lengas e Civilizacions de l’Orient Pròche a l’Universitat de Yale“.
La descobèrta d’autres ieroglifes
L’excavacion arqueologica es estada realizada per de scientifics de Yale, lo Musèu Reial d’Art e Istòria belga e doas comissions scientificas egipcianas d’Assoan e Edfu. Aquesta meteissa còla tanben a trobat d’autres ieroglifes amb d’elefants que pòrtan de signes sul còrs. E l’edat dels ieroglifes seriá d’aperaquí entre 4000 e 3500 ans abans lo Crist. “Un dels elefants representats es una elefanta prens“, çò confirmèt Darnell.
De mai, los arqueològs an identificat quatre simbòls creats en 3250 a.C. e escriches de drecha a esquèrra, coma o faguèron mai tard de manièra generala los egipcians dins lors tèxtes. Son los imatges del cap de buòu e de l’ibis en naut. Un senhal clar que parlariá del cicle solar e de la luminositat.
“Son d’imatges qu’evòcan lo concèpte de l’autoritat reiala sus lo còsmos e l’òrdre, çò diguèt Darnell. E mai siá pas una descobèrta excepcionala pr’amor que ja son estats trobats abans d’autres ieroglifes tant ancians, es lo primièr còp que son estats descobèrts a una escala tan granda”.
Aital, los ieroglifes fan mai de mièg mètre de nautor e lo panèl ont son estats trobats mesura mai de 70 centimètres. Fins ara solament èran estats trobats de signes ieroglifics que fasián a pena qualques centimètres. Al delà, l’airal ont son estadas trobadas las inscripcions es lo desèrt d’Elwab. Un airal que, amb lo flume e la vila de Ieracompolis (o Nekhen), foguèt lo centre mai important de la cultura dins l’Egipte anciana d’aquela epòca. Son de ieroglifes que demòstran que la creacion d’aqueste sistèma comunicatiu nasquèt dins una granda zòna a l’encòp.
“Son una pròva clara que lo desvolopament del primièr sistèma d’escritura ancian egipcian foguèt pas lent, çò soslinhèt Darnell. E foguèt pas pensat per de trabalhs burocratics. Foguèt puslèu un sistèma d’escritura fòrça divèrs e espandit geograficament e que cresquèt lèu-lèu après sa creacion. Per ansin ara se pòt dire que son espandiment coma sistèma de comunicacion es fòrça mai ample que lo material arqueologic trobat fins a uèi lo jorn”.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
