QUORA L’ÒME ARRIBÈT AL TIBET
L’arribada de l’òme modèrn al replanat de Tibet èra estada estimada en d’aperaquí 11.700 annadas. Las causas ne serián lo clima, un dels piègers de la planeta, e la nautor, que fan d’aquel país un dels mens espitalaris per la nòstra espècia. Ara l’Academia Chinesa de Sciéncias ven de confirmar l’existéncia d’un sit arqueologic nomentat Nwya Devu que l’òme modèrn i auriá demorat fa ja pus de 40.000 annadas. Aquesta seriá la data primièra de l’arribada de l’òme al replanat de Tibet.
La confirmacion d’aquelas donadas arqueologicas son estadas publicadas al numeric Science per una còla de l’Institut de Paleontologia e Paleoantropologia de Vertebrats, jos la direccion de Zhang Xiaoling. Aquò situariá aquel sit arqueologic coma lo pus naut de la planeta jamai trapat fins uèi – fins ara que n’èra un situat als Andes a mai de 4.480 mètres sus lo nivèl de la mar – pr’amor que seriá a mai de 5.000 mètres de nautor.
Abans de la descobèrta del sit de Nwya Devu al tech del mond – a solament 300 Kms al nòrd-oèst de Lhasa, la capitala del país – i aviá pas cap evidéncia de populacion umana dins lo replanat tibetan mai enlà de l’Olocèn. E los paucs sits arqueologics qu’èran estats descobèrts de l’epòca del Pleistocèn (entre 11.700 e 2,58 milions d’annadas) èran estat trapats en la frontièra del replanat de Tibet e pas dins lo quite replanat.
Segon la còla de cercaires chineses que trabalhèt los darrièrs ans dins lo sit de Nwya Devu l’estratrigrafia del sit es demorada intacta e per ansin l’edat del sit foguèt estimada d’una manièra fòrça drecha.
Lo pus naut campament uman de la planeta
Los arqueològs que trabalhèron en Nwya Devu volguèron soslinhar la granda quantitat d’espleches de pèira trobats dins lo sit a mai de divèrsas esqueletas sepelidas que demostravan que l’airal foguèt ocupat de manièra contunha. Segon aquò seriá lo sit paleolitic pus naut de la planeta e lo mai ancian del replanat tibetan. E aquò maugrat lo dur clima de la region.
Lo replanat del Tibet es un airal situat a una tras que granda nautor ont l’òme pòt patir normalament d’ipoxia atmosferica, amb de temperaturas plan fredas pendent tot l’an e ont la pauca pluèja pòt crear un environament fòrça dur per la colonizacion umana. Segon l’arqueologia mondiala seriá un dels darrièrs luòcs colonizats per Homo sapiens sapiens precisament per sas condicions naturalas ( maugrat que i a de cercaires que dison que ne foguèt mai lèu l’espècia denisovana).
La còla chinesa que publiquèt l’estudi afirmèt que la tròba de Nwya Devu e la confirmacion de la sieuna edat aurián entraïnat una ocupacion umana del replanat d’aquel país fòrça mai prigonda, a mai de mostrar un tipe d’adaptacion totalament estonant.
Aquò se seriá debanat pendent lo Pleistocèn, que finiguèt fa 10.000 annadas e que, foguèt un periòde crucial per l’evolucion umana. D’efièch, la coneissença e sapiéncia dels umans de l’epòca se desvolopèt d’una manièra tras que rapida, que mostrèt que lèu se podiá adaptar a tota sòrta de climas e environaments.
Nwya Devu auriá mostrat doncas d’importantas evidéncias sus las estratègias de subrevivéncia d’aqueles òmes e cossí actuavan dins un dels environaments mai durs de la Tèrra. A mai, çò apondèron los cercaires chineses, seriá estat un sit clau dins lo comèrci regional pr’amor que foguèt plan important dins las migracions que i aguèron entre l’èst i l’oèst del replanat del Tibet en aquela epòca.
La Redaccion
