Un dels mistèris pus importants de l’istòria es encara conéisser l’emplaçament exacte de la tomba de la mitica reina Cleopatra VII d’Egipte. Fòrça istorians opinan que foguèt sepelida amb d’onors de reina e al costat de son aimat Marc Antòni a Alexandria, la vila capitala de la dinastia dels Ptolemèus, mas lo tèrratrem de l’an 365 e lo tsunami posterior que i aguèt destruiguèt la vila egipciana, provoquèt que la siá tomba foguèsse inondada jos las aigas del dèlta del Nil o la mar Mediterranèa.
Divèrsas expedicions arqueologicas an pas capitat de trobar cap de resulta definitiva. Mas sabèm pas la situacion dels autres monarcas egipcians de la dinastia dels Lagidas o Ptolemèus.
Una ipotèsi pas demostrada
Una de las ipotèsis situa la tomba de Cleopatra dins la vila de Taposiris Magna, a cinquanta quilomètres a l’oèst d’Alexàndria. Dins las sieunas runas arqueologicas foguèron trobadas divèrsas tombas contemporanèas al règne de la darrièra reina de l’Antiquitat egipciana, amb fòrça joièls e decoracion tipica de personas de la nauta societat egipciana de l’epòca. Mas cap de momia trobada foguèt pas identificada coma Cleopatra encara.
D’excavacions efectuadas dins aquela expedicion trapèron un tunèl escavat a la ròca de mil tres cents mètres de longor e dos mètres de nautor, a tretze mètres de prigondor. Benlèu es estonanta una prigondor coma aquela, mas cal pas oblidar que los tèrratrems an afondradas fòrça construccions pendent los darrièrs vint sègles d’istòria d’Egipte. Serà aquela expedicion arqueologica la definitiva per poder conéisser, fin finala, l’emplaçament d’un dels personatges istorics mai mitics?
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm
