Una còla scientifica internacionala mesurèt la quantitat actuala de microplastic que i a al fons de la mar: fins a 1,9 de miliards de milions de pèças de plastic dins un solet mètre cairat. Segon aquò, mai de dètz tònas de plastic dintrarián dins la mar de manièra annadièra. E maugrat qu’a l’ora d’ara la societat umana internacionala es mai sensibla al problèma del plastic al mar, los scientifics volguèron avisar qu’aquel tipe de plastic sonque se tròba sus la superfícia de l’ocean e solament seriá l’1% del plastic que i a uèi lo jorn dins la mar.
L’autre 99% dels plastic que i a als oceans de la planeta seriá, segon lo nòu estudi, al fons de la mar, e aquò entraïnariá de nivèls de plastic als oceans de la Tèrra jamai observats abans. L’estudi foguèt publicat al numeric Science per una còla de cercaires de las universitats de Manchester, Bremen, l’institut francés de la mar IFREMER e l’Universitat de Durham, entre d’autres.
Per ansin, al fons de la mar i auriá a l’ora d’ara, una quantitat gigantassa de pichons tròces de plastic, los nomenats microplastics que ja aurián començat a formar divèrses nivèls de depaus a mai del plastic qu’òm pòt trapar normalament a la superfícia de la mar.
De nivèls jamai coneguts abans
Segon l’autor principal d’aquel estudi, Ian Kane, “totes coneissiam plan la quantitat gigantassa de plastic que i dins la mar mas çò que foguèt vertadièrament estonant, çò confirmèt Kane, foguèt descobrir que i aviá encara mai microplastic al fons de la mar que non sus la superfícia dels oceans”.
En mai d’aquò, los cercaires poguèren confirmar que i a d’airals a l’ocean ont encara i a pus plastic qu’en d’autres pr’amor dels corrents intèrns que i jos la mar. Lo microplastic seriá fach de fibra textila qu’es pas brica filtrada abans de dintrar al mar a travèrs de flumes e rius.
Un còp a l’ocean, mai d’un corrent pòrta aquel microplastic fins lo fons de la mar. E ailà se forman divèrses depaus de material mai e mai grands. A mai, los corrents oceanics tanben menan d’oxigèn e elements nutritius a aqueles luòcs de nauta concentracion de plastic en tot formar nòus ecosistèmas ont lo microplastic es embegut. Trapar aquelas zònas serà, dempuèi ara, doncas, tras qu’important se volèm sauvar los oceans. L’estudi foguèt justament fach al Mediterranèu.
Segon Mike Clare, que tanben participèt en aquel estudi scientific, “los corrents marins son fòrça importants a l’ora de cercar e trobar d’airals amb de microplastic. Aital, conéisser plan los corrents marins pòt ajudar e fòrça a trapar ont es la rèsta de microplastic qu’es pas sus la superfícia”.
D’un autre costat, Florian Pohl, de l’universitat anglesa de Durham, confirmèt que “per malastre, lo plastic es vengut un nòu tipe de particula sedimentaria al fon marin, a mai del sable, la fanga e los elements nutritius. Los corrents oceanics, totun, menan mai de plastic a cèrtas zònas que a d’autras, e per sauvar la mar cal ara conéisser plan aqueles corrents”.
La Redaccion
