Un nòu estudi realizat als Estats Units confirma que la consomacion d’òli d’oliva entraïna dirèctament un mendre risc a l’ora de patir puèi deméncia. E aquò es independent de la dièta de la persona. La deméncia es una malautiá que provòca la pèrta de memòria pendent la vida vidanta d’una persona. Justament l’Alzheimer es una malautiá progressiva e mortal patida uèi per mai de 5,7 milions d’estatsunitencs e es la forma pus comuna de deméncia.
“Se pòt confirmar qu’una dièta amb d’òli d’oliva o d’òlis vegetals ajuda plan la santat e ajuda encara mai la santat del cervèl, çò diguèt Anne-Julie Tessier, de l’Escòla Publica de Santat T.H.Chan de Harvard. Causir un produch natural coma l’òli d’oliva enluòc de greisses o margarina o encara de saussas divèrsas es plan mai segur, e redusís lo risc de patir puèi deméncia”.
Per far aquel estudi, los cercaires analizèron de donadas de mai de 60,582 femnas e aperaquí 31,801 òmes. La resulta confirma qu’aquelas personas que consomisson mai de mièg culhièr d’òli d’oliva de biais jornalièr an fins a un 28% mens de risc de patir puèi deméncia, restacadas amb aquelas personas que consomisson mai o gaireben mai d’òli d’oliva. En mai d’aquò, cambiar un culhièr de saussa o de margarina per d’òli d’òliva es restacat dirèctament amb un 8-14% mens de risc de patir puèi deméncia.
Una dièta pus sana
L’estudi tanben suggerís qu’aquelas personas que consomisson cada jorn d’òli d’oliva e pas de greisses animals an una santat màger. L’estudi, pasmens, analizèt la consomacion d’òli d’oliva independentament de la qualitat de la dièta de las personas.
Aquò, segon los cercaires de l’estudi, pòt suggerir que l’òli d’oliva a de proprietats unicas e plan bonas per la santat del cervèl. “Qualcunes antioxidants qu’a l’òli d’oliva pòdon trincar lo mur de la sang del cervèl e entraïnar un benefici dirècte pel meteis cervèl, çò apondèt Tessier”.
“Tanben se poiriá dire que l’oli d’oliva va plan per la santat del cervèl pr’amor que tanplan entraïna una melhor santat cardiovasculara”. Los cercaires de l’estudi publiquèron la resulta al numeric Nutrition 2023 pendent la tròba annadièra de la Societat Estatsunitenca de Nutricion.
La Redaccion
