Los òmes qu’ejaculan mai sovent an un risc mai petit de patir del càncer de la prostata, segon çò confirmat per un estudi que s’a realizat ongan als Estats Units. Los cases de càncer d’aqueste tipe serián en relacion directa amb lo nombre d’ejaculacion masculinas mensualas.
L’estudi començèt en 1992 e contunhèt fins l’an 2010. 32.000 personas foguèron estudiadas scientificament e d’aquestas solament 4.000 aguèron, fin finala, de càncer de la prostata. Coma èra possible ? I aviá un factor decisiu ? Òc ben, las ejaculacions masculinas.
Segon aqueste estudi estatsunitenc, los òmes qu’ejaculan mai de 21 còps al mes an un 19% d’escasenças d’aver càncer de prostata. Aquò per rapòrt als òmes que solament an 7 ejaculacions mensualas. E sustot, se los òmes an mai de 40 ans, l’escasença se reduís dinc al 22%. Las chifras son estonantas, las conclusions tanben.
Un estudi amb de conclusions inesperadas
Maugrat que los scientifics qu’an fach l’estudi an confirmat que las conclusions son scientificas, ja son sortidas votzes d’autres doctors que non vòlon ni soslinhar ni confirmar res.
Aquò es lo cas del medecin de Sant Lòis, de la Universitat de Medicina d’aquela vila, Siobhan Sutcliffe, que non a pas participat a l’estudi, mas que confirma “qu’ara non se pòt pas encara parlar dels beneficis del sexe coma prevencion contra lo càncer”. L’activitat sexuala poiriá aver tanben de consequéncias per la santat , – çò diguèt – coma adquirir malautiás de transmission sexuala e infeccions divèrsas”.
Al delà d’aquò, d’autres medecins coma John Gore, un urològ de la Universitat de Washington, en Seattle, soslinha ” que la frequéncia d’ejaculacions o de masturbacions pòt ajudar e plan d’autres factors coma aver una bona santat, que deu estre sostat ça que la per un pes normal e una dieta sana. Tot aquò amassa – çò confirmèt – pòt ajudar e ajuda fòrça de non aver pas de càncer de la prostata”.
Pasmens l’estudi tanben racónta que l’istòria genetica dels òmes estudiats es un factor mai grand que non pas las sieunas conclusions.
La Redaccion
