En la natura i a d’èssers vius que pòdon èsser considerats coma de zòmbis. De zòmbis ? Avèm legit plan ? E òc, pr’amor que i a cèrts parasits que crèan de zòmbis. Aital, i a de parasits en la natura que transforman lors victimas en de mariòtas sens cap volontat pròpria, e los parasits butan l’animal a nhacar d’autres animals maugrat que pòdon pérdre lor pròpria vida.
Per ansin, lo regne animal es plen de zòmbis. Aquelas pauras creaturas son pas de mostres mòrts-vius que manjan de cervèls. Son d’animals que son venguts idiotas, dont los còsses son estats envasits per de parasits. Aqueles parasits comprenon de virus, e dintran dins de vèrmes, de vèspas e encara d’autres organismes. E un còp qu’un d’aqueles parasits a infectat un òste, pòt forçar l’òste a far çò que vòl, tanben al prètz de la vida de l’òste.
De parasits òrres
Dins la natura i a de parasits zombifiants òrres e ne podèm trapar per tota la planeta. E maugrat que n’i a fòrça mai, amb sonque tres exemples poirèm aprene cossí agisson. Ophiocordyceps es un grop o genre de campairòls. Quand las espòras d’aqueles campairòls tomban sus un insècte, dintran dins son interior. Puèi, començan de créisser e desvian l’esperit de l’animal òste. Lo campairòl dirigís la victima cap a un endrech amb de bona temperatura, d’umiditat o d’autras condicions necessàrias per la creissença del campairòl. Las tijas del campairòl sortisson puèi del còs de l’insècte per escupir d’espòras sus de novèlas victimas.
Un autre d’aqueles parasits que pròvoca la transformacion de l’animal en un vertadièr zòmbi es Euhaplorchis californiensis. Son de vèrmes que s’installan dins una part del cervèl del peis piranha de Califòrnia. Mas pòdon pas se reproduire se es pas dins las entralhas dels aucèls. Aital, los vèrmes obligan los peisses a nadar prèp de la superfícia de l’aiga. Es aicí ont lo peis pòt èsser manjat…per un aucèl. E lo parasit pòt alavetz se reproduire per tornar atacar un autre òste.
Fin finala, la vèspa jòia. Las femèlas de vèspa jòia injèctan de verin per contrarotlar lo cervèl d’animals coma las babaròtas. Aquò permet la vèspa de ligar una babaròta per la sieuna antena per totjorn. La vèspa, après, tornarà la babaròta al nis de las vèspas, ont pond un uòu laguens la babaròta. La naissença de la nòva vèspa entraïnarà que la meteissa devorarà l’òste e poirà començar a viure.
La Redaccion
