En un monde que sembla en declin pertot, e on tots los animaus e plantas que començan a patir ua grèva crisi, trobar notícias positivas qu’ei de mei en mei rar. E quan aquò se debana, cau dilhèu soslinhar l’importància de la medisha notícia sus las autas. Uei la notícia ei la creishença de dinc a 30 còps mei lèu de la populacion de cicnes, aqueths ausèths gigantescs e plan beròis, en divèrsas resèrvas naturaus anglesas, plan près d’ací. E los cercaires ac an volut confirmar pr’amor qu’aver de mei en mei resèrvas naturaus ei de besonh se volem, enqüèra, sauvar l’environament que i al nòste tor.
Los nivèus de creishença de la populacion de cicnes que demoran en resèrvas naturaus anglesas, son dinc a 30 còps màgers que los de las populacions de cicnes que i a en dehòra d’aqueras medishas resèrvas naturaus. E un estudi scientific ac confirma. Los cicnes, son ausèths qu’ivèrnan en Anglatèrra e que a l’estiu se’n van a Islàndia. Entà har l’estudi los cercaires analisèn dinc a 30 annadas de dadas.
Segon aqueth estudi navèth etologic, totas las populacions de cicnes que i a en resèrvas naturlas anglesas avón ua creishença estonanta pr’amor que son airaus protegits. La creishença estó autan hauta que mantun cicne enqüèra se n‘anè a territòris situats mei au delà d’aqueras resèrvas naturaus en tot ensajar de colonizar mei d’espaci naturau.
L’estudi estó realizat per ua equipa de cercaires de l’Universitat d’Helsinki e tanben d’Exeter, en Anglatèrra. Dinc adara se pensava que los cicnes que i avèva en resèrvas naturaus qu’avèvan mensh escadenças de se reprodusir e que la fauta de diversitat genetica provocaré un problèma d’isolament génétic final. Totun, víver en un espaci naturau protegit tanben a avantatges, pr’amor que la tassa de reproduccion tanben ei mei hauta. E donc lo resultat finau de l’estudi qu’ei balhar mei d’importància enqüèra a las resèrvas naturaus, pr’amor que pòden vàder un tesaur environamentau entà la fauna e la flora deu lòc.
Lo melhor camin
« Ua resèrva naturau protegida qu’ei lo camin melhor entà arrestar lo declin d’ua espècia, dit Andrea Soriano Redondo, de l’Universitat d’Exeter. E quan i aja un 30% deus espacis de la planeta protegits per lei en 2030, i aurà ua escadença reau de sauvar la fauna e la flora deu monde ».
Atau, e segon aquera cercaira, ua resèrva naturau qu’ei un lòc ideau entà ua populacion de cicnes, pr’amor que son protegits totaument e que pòden tornar a créisher de faiçon rapida. Segon l’estudi, la populacion de cicnes que i a uei en aqueras resèrvas naturaus anglesas que poiré vàder quasi lo doble en 2030. La tassa de reproduccion annau qu’ei deu 6% e en dehòra de las resèrvas naturaus de solament un 0,2%.
La creishença deus cicnes qu’estó autan grana que tanben creishè la soa densitat e donc que contunhèn en tot s’esàndir au dehòra de las resèrvas naturaus e airaus pas protegits. E los que comencèn a aquò har qu’estón, com s’ei debanat tostemps, los mei joens.
“Protegir solament drin aqueras populacions d’ausèths, ajustè Stuart Bearhop, de l’Universitat d’Exeter, qu’entraina efèits gigantescs e plan positius entad aqueras medishas populacions. E tanben enqüèra quan las espècias estudiadas son plan nomadas.”
En efèit, los cercaires que con·hessèn que, uei, dejà i a hèra espècias que, shens neuritud balhada peus umans, ne pòden pas mei subervíver, e que pr’açò cau crear mei d’espacis naturaus protegits se volem sauvar tanben lo noste futur.
La Redaccion
