La descobèrta de l’impression de mans e pès d’un ancian ominid sus una pèira a Tibet ongan fariá retardar la data de l’art mai ancian jamai facha per una espècia ominida tornarmai. L’imatge trobada ara al replanat de Tibet auriá una edat d’entre 169 000 e 226 000 annadas e semblariá èsser estada facha, segon los quites cercaires, per denisovans. Malgrat la tròba, los cercaires sabon pas qué volon diré aqueles símbols o perqué foguèron pintats.
“Foguèron fachas de biais voluntari, çò diguèt Thomas Urban, de l’Universitat de Cornell, mas es pas possible conéisser perqué foguèron fachas o cossí podèm las interpretar. Sonque podèm confirmar que foguèron daissadas sus la pèira pendent lo Pleistocèn mejan, e, benlèu, pas per la nòstra espècia. Pas gaire mai”.
Se pòt parlar d’art ?
Mai d’un ja demandèt se aquesta impression de mans e pès pòt èsser tanben considerada coma art, car, alavetz, plusors impressions fachas per d’autras espècias ominidas, coma los neandertalians, poirián èsser tanben classificadas coma òbras d’art primitivas. Un fach que fins a uèi se debanèt pas. E fins a uèi òm sonque considerava d’òbras d’art aquelas representacions fachas solament per la nòstra espècia. Mas perqué doncas ara los cercaires considèran que son d’òbras d’art aquelas impressions e pas abans ? La polemica artistica e scientifica demòra, tornarmai, dubèrta.
Las impressions ara trobadas foguèron descobèrtas sus una pèira pròcha al vilatge tibetan de Quesang, aperaquí 80 Km al nòrd-oèst de Lhasa, la capitala de Tibet, prèp d’un riu. Segon semblariá foguèron ailà daissadas fins a cinc impression de mans e pès de mainatges ominids. Pels scientifics las impressions son de dos mainatges amb una edat de 7 e 12 ans. Mas òm poguèt pas confirmar se l’espècia qu’o faguèt foguèsse la nòstra.
Fins ara, la majoritat d’esqueletas fossilas d’ominid trapadas a Tibet foguèron denisovans, e pr’açò los cercaires creson que, benlèu, ne poirián èsser los responsables. De soslinhar que, fins ara, l’art pus ancian jamai trobat es l’art trobat a la cauna de Sulawesi, qu’auriá una edat certa de mai de 39 000 annadas. L’estudi foguèt publicat al numeric Science Bulletin.
La Redaccion
