L‘AASOC, amb la companhiá de l’escrivana e activista culturala Montserrat Rubinat, intervenguèt a la cinquanta cinquena edicion de l’Universitat Catalana d’Estiu a la vila de Prada de Conflent.
Lo motiu de la conferéncia èra ligat a las relacions afectivas e culturalas entre Catalonha e Occitània pendent l’istòria. Un tèma tan ample foguèt desvolopat a travèrs de divèrses capítols d’aquela longa istòria, en començant per l’Edat Medievala e las relacions entre los linhatges aristocratics catalans e occitans e la ierarquia eclesiastica d’ambedoas nacions amb lo capítol essencial de la Crosada contra los Catars al sègle XIII.
Aprés l’edat medievala
L’immigracion occitana pendent los sègles XVI e XVII, amb familhas que fugissián tanben de las persecucions religiosas foguèt desvolopada coma tèma: en qualqu‘unes moments, un tèrç dels abitants del Principat de Catalonha èra occitan o descendent d’occitans!!!
Montserrat Rubinat desvelopèt las relacions culturalas (sustot literàrias) entre los escrivans de la Renaissença Catalana e lo Felibritge Occitan, una relacion intensa e fòrça interessanta pels ambients culturals d’ambedoas nacions.
Tanben pendent la conferéncia foguèt reivindicada una vision globala de totes los territòris occitans a las institucions, mas tanben una defensa de l’identitat, la lenga e la cultura de la Val d’Aran. D’idèas complementàrias, que s’excluson pas.
L’Universitat Catalana d’Estiu nasquèt l’an 1969 per aufrir de coneissença e debat sus de geografia, d‘istòria, de cultura, de literatura, de filologia… dels territòris de lenga catalana, en un moment que lo regim franquista aviá enebit d‘ensenhar a las universitats (e a cap de centre educatiu) aquela sabença. Ongan, l’UCE contunha d’èsser una referéncia e un luòc d’amassada per l’intellectualitat del domeni catalan, e un dels eveniments academics mai importants de la Catalonha del Nòrd.
De debats, conferéncias, presentacions de libres e de trabalhs de recèrca, concèrts… compausen l’ofèrta cada an de l’Universitat Catalana d’Estiu pels sieus participants.
L’eleccion de Prada de Conflent per celebrar annalament aquela universitat d’estiu foguèt fòrça ligada a la mòrt l’an 1948 a l’exili de Pompeu Fabra, lo creador de las nòrmas ortograficas e gramaticalas de la lenga catalana, que venguèron una pèça fondamentala per la normalizacion del catalan. Coma fòrça d’autres intellectuals catalans, Pompeu Fabra deguèt fugir de la repression franquista e moriguèt a la capitala de la comarca del Conflent.
En aquela edicion de l’an 2023, s’es commemorat lo cinquanten anniversari de la mòrt del grand violoncelista e compositor Pau Casals, tanben a l’exili a San Juan de Puerto Rico. En l’istoric marc del monastèri romanic de Sant Miquel de Cuixà, foguèt celebrat un aumenatge amb la preséncia de la majoritat dels presidents catalans dempuèi l’an 1980, que representavan la granda consideracion de Catalonha cap a unes dels sieus musicians mai universals.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
