De còps, ausissèm dire que prene de sal es pas bon per la santat. Aquò, qu’a coma causa dirècta de vielhs estudis scientifics, es ara demostrat coma una conclusion marrida. De nòus estudis confirman que prene de sal ambe los aliments de manièra normala e regulara va plan per la santat. E encara pus, va pas plan se i a pas pro consum de sal.
Segontes de nòus estudis doncas, prene de sal de manièra jornalièra es bon per la santat. La resulta d’un estudi realizat fa pas gaire confirmèt que solament se prenem mai de 5 gramas/jorn – çò es dos culherons e mièg – i a una creissença del risc d’ataca cardiaca e d’autras malautiás cardiovascularas.
Mas las chifras donadas en de nòus analisis sus lo consum de sal en pus de 21 païses soslinhèt que solament 5% dels individús que demoran en de païses desvolopats prenon mai de 5 gramas/jorn. E aqueles pòdon eliminar la desmesura de sal amb una dièta bona de frucha, vegetals, trufas e d’autres aliments rics en sòdi.
China es lo màger consumidor
L’estudi analizèt lo consum de sal jornalièr de 94.000 personas amb d’edats comprenudas entre 35 e 70 annadas pendent pus de 8 ans e determinèt coma conclusion que solament i a de risc per la santat umana en tot prene mai de 5 gramas/jorn.
China es lo solet estat de la planeta ont pus de 80% de las comunautats estudiadas prenon mai de 5 gramas/jorn de sal. Dins los autres païses lo consum mejan es d’entre 3 e 5 gramas/jorn de sal – entre 1,5 e 2,5 culherons de sal -.
“L’Organizacion Mondiala de la Santat recomanda prene mens de doas gramas de sal de manièra jornalièra (un culheron de sal) per prevenir de malautiás cardiovascularas – çò diguèt Andrew Mente, de l’Universitat McMaster e cap de l’estudi -. Totun, i a cap d’evidéncia sus lo risc de prene mai sal en aquelas pichonas quantitats”.
“A mai, dins la soleta comunautat ont avèm encontrat de nivèls mai nauts de cinc gramas/jorn – çò contunhèt Mente -, lo risc es pas dirècte e pichon. E dins aquelas personas que prenon mens de 5 gramas/jorn lo risc d’infart de miocardi es mai naut qu’en d’autras personas”.
Segontes la còla qu’a fach aquel estudi d’autres estudis mai vielhs aurián coma basa d’informacions individualas e pas collectivas. Pr’aquò demandan un cambi dins las estrategias de santat publica mondiala per confirmar que prene fins a 5 gr/jorn de sal va plan per la santat. L’estudi es estat publicat al numeric The Lancet.
La Redaccion
