La krait raiada (Bungarus fasciatus) es al còp una de las sèrps pus verinosas e tanben mai desconegudas de tota la planeta. Es un serpent apertenent a la familha dels Elapidae e pòt far mai de 2 mètres de longor aisidament. L’abitat natural d’aquesta sèrp es Índia e d’autras regions del Sud-Èst asiatic.
Per ansin, la krait raiada es del genre dels bungarus, atanplan coneguts coma kraits. Es un genre de serpents que sonque demòran en Asia mas son classificadas en 12 espècias desparièras e 5 sosespècias. La krait raiada es, malgrat la siá beltat, una de las sèrps màgers d’aquel genre e tanben es celèbra en Índia per èsser una de las pus verinosas e doncas de las mai perilhosas.
La krait raiada a la costuma de viure plan pròcha a l’aiga en cèrtas regions d’Índia e Paquistan mas tanben en Bornèu, l’illa de Java e encara d’autras illas pròchas. Lo verin d’aqueste serpent es plan conegut pr’amor qu’es fins a 16 còps pus potent e rapid que lo posion de la pròpria còbra, que, benlèu, es pus celèbra que la krait raiada, malgrat aquel fach.
Reconéisser una krait raiada es plan aisit car an de raias jaunas e tanben an, de còps mas pas totjorn, de raias negras que tanplan pòdon èsser blavas o encara brunas. A mai, an la nomentada cresta vertebrala plan soslinhada e facha per d’escuts vertebrals plan longs que pòdon èsser agachats al long de tot lo còs del serpent.
D’un autre costat, lo cap de la krait raiada es plan estrech e a los uèlhs negres. Lo cap a forma de sageta e es de color negre amb de pichonèlas marcas jaunas. Tanben son jaunes los pots d’aquel serpent e tanben lo menton e lo còl. La nhacada d’una krait raiada pòt provocar la mòrt lèu lèu a l’èsser uman pr’amor del sieu verin. En tot nhacar un uman pòt transmetre entre 20 a 115 mg de neuro-toxinas pre e post simpaticas qu’entraïnan lèu de vòmits, de diarrèa, d’estabordiment e una fòrta dolor abdominala. Se l’uman recep mai de 100 mg de poison e cap antidòt lèu pòt patir de grèus problèmas respiratòris e, fin finala, la mòrt per asfíxia.
Un serpent amb antidòt
Urosament pels umans òm desvolopèt fa temps un antidòt contra lo poison de la krait raiada. Pasmens, se òm tròba un especimèn d’aquela espècia çò de melhor es l’inquietar pas e la dublidar pr’amor que lo dangièr es tras que naut. Cal pensar que sovent l’òme es luenh d’un espital e lo temps, quand òm patís una nhacada de sèrp verinosa, es clau.
A mai, la krait raiada es un serpent plan agressiu e doncas es melhor se n’aluenhar. Una autra sèrp pròcha a la krait raiada e tanplan plan dangierosa es la celèbra krait marina. Aquesta encara es pus perilhosa. Es estada classificada coma lo serpent mai dangierós de tota la planeta pr’amor que, malgrat que demòran totjorn dins de l’aiga e es pas conegut cap cas d’ataca a l’èsser uman, la sieuna nhacada es totjorn mortala.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
