Sovent explicar qué dison los scientifics quora afirman un prètzfach nòu es tanplan malaisit. Malaisit pel jornalista mas tanben pel legeire que pòdon, tanplan, comprene pas o res de tot çò dich. E poiriá èsser lo cas de la darrièra descobèrta que los fisicians ara an soslinhat: los objèctes massius de tot l’Univèrs dessapareisseràn. E perqué ?
Segon la mecanica quantica lo vued es totjorn format per un parelh de particulas que contunharàn aital fins a la sieuna fin finala. Son de fluctuacions quanticas que sonque pòdon venir realas se i a tanben un camp de fonz. L’efièch Schwinger ne seriá la resulta pus evidenta: es çò que permet predire la creacion de parelhs de particulas cargadas en un camp electric.
Ara d’astrofisicians de l’Universitat de Radboud an demostrat l’existéncia d’un procés de creacion de particulas de la gravetat en d’espacis corbs parièra a l’efièch Schswinger. Segon los cercaires qu’aquò afirman poguèron aquò far en tot mesclar de fisica quantica, la teoria de la gravetat d’Einstein e de teorias d’Hawking, que ja confirmèt la fin dels parelhs de particulas prèp de l’orizont d’evenements – un orizont d’evenements es una frontièra dins l’espaci-temps per un observaire e ont mai enlà d’aquela i pòt pas dintrar cap informacion nimai la lutz).“Son de parelhs de particulas e antiparticulas que s’anihilan pauc aprés la sieuna creacion”.
Pas totjorn
Los cercaires tanben confessèron qu’aquò es pas totjorn aital, pr’amor que, de còps, una particula d’aquel parelh es chucada per un trauc negre e aital l’autra pòt fugir (un prètzfach tanben confirmat per Hawking en la siuena radiacion de particulas). Caliá doncas cercar se tot aquò podiá èsser demostrat. O pas.
Los cercaires utilizèron de tecnologia del mond de la fisica mas tanben de l’astronomia e la matematica. Caliá descobrir se aqueles celèbres parelhs de particulas èran creats prèp dels traucs negres. Los scientifics poguèron demostrar qu’aqueles parelhs de particulas tanben pòdon èsser creats mai enlà de l’orizont d’evenements.
“A mai de la radiacion d’Hawkings, i a tanben una autra forma de radiacion, çò diguèt Michael Wondrak, de la còla de cercaires qu’aquò estudièt. Plan mai enlà d’un trauc negre i a una corbadura de l’espaci e lo temps essenciala per la radiacion d’aquelas particulas”.
Segon aquò, aquelas particulas se desseparan pr’amor de la gravetat. Fins ara los cercaires cresián pas qu’aquò foguèsse possible sens l’orizont d’evenements. Ara an trapat qu’aquel orizont es necessàri per aquel tipe de reaccion fisica. E aquò tanben vòl dire que totes los objèctes massius que son pas dins un orizont d’evenements, de vielhas estelas o encara d’autres objèctes massius de tot l’Univèrs, tanben patiràn aquel tipe de radiacion gravitatòria, çò qu’entraïna dire que se debanarà la sieuna fin.
La Redaccion
