Après far un estudi a nivèl internacional, una còla scientifica a pogut identificar fin finala tres variantas geneticas ligadas al bonur e tanben doas mai restacadas als simptòmas depressius. Èsser neurotic – un trach de la personalitat que consistís en aver una tendéncia a experimentar afecte negatiu – tanben a pogut èsser restacat a 11 variantas geneticas.
L’estudi es estat dirigit per Meike Bartels e Philipp Koellinger, de la Universitat olandesa de Vrije e Daniel Benjamin, de la Universitat del Sud de Califòrnia e es estat fach sus mai de 298.000 personas. Los resultats son estadas publicadas a la revista Nature Genetics.
“Ara sabem que i a una causa genetica dins lo bonur e las tres variantas identificadas – çò diguèt Meike Bartels – son solament una partida plan pichona de las desparietats entre los èssers umans. Amb aquò s’es dubèrt un nòu començament en l’estudi de la genetica e de l’èsser uman”.
Aital, la còla de scientifics qu’a fach l’estudi confirma que lo bonur es una tematica de mai en mai estudiada per la sciéncia e que es pas estudiada solament per la genetica mas tanben per fòrça d’autras disciplinas. La causa seriá benlèu l’insisténcia de la classa politica en tot suggerir que lo bonur a coma causas factors mentals e fisics. E abans d’o confirmar o caliá estudiar scientificament.
Segon aquesta còla, las variantas geneticas que son la causa del bonur se tròban dins lo sistèma nerviós, las glandulas adrenalas e lo sistèma pancreatic. De mai, los genetistas qu’an fach aquel estudi son fòrça contents pr’amor qu’an pogut tanben trobar las causas dels simptòmas depressius.
“Aquò es una plan bona notícia pr’amor qu’ara avèm una nòva vision sus las causas d’una de las malautiás mai comunas de la nòstra epòca: la depression – çò diguèt Meike Bartels -. La descobèrta serà una granda ajuda en la luta contra aquesta malautiá”.
Christian Andreu
