ES TIRANOSAURES PATIEN FÒRÇA PES UASSI
Sonque era sciéncia permet poder cambiar un còp e aute era imatge mentau qu’auem des protagonistes dera istòria dera nòsta planeta. E açò solament ac podem hèr damb era ajuda dera tecnologia mès modèrna. Qué pensaríetz se vos diguéssem que Tyrannosaurus rex, eth rei des dinosaures carnivòrs ,siguec ath còp un animau que patie e fòrça per ua malautia des uassi? Pr’amor qu’aguesta ei era resulta deth darrèr estudi hèt des uassi d’aqueth carnivòr.
Atau, un recent estudi hèt damb un escanèr de tipe CT a mès dera utilizacion d’ua tomografia computerizada d’energia duau permetec conéisher qu’es tiranosaures sigueren quauques bèsties qu’auien infeccions des uassi. Era còla de cercaires alemands qu’ac descorbic podec confirmar qu’era malautia ère osteomelitis tumefactiua.
Era origina d’aguest descorbiment siguec era trapa, en 2010, d’un des crans mès ben conservadi de Tyrannosaurus rex an Alemanha. Eth carnivòr auie ua edat d’aperaquí 68 milions d’annades e auec eth nòm de Tristan Otto e lèu siguec venut ath Musèu dera Natura de Berlin. Dempús, eth musèu demanèc ua analisi des uassi e diuèrsi cercaires der espitau dera universitat dera Charité, dirigits per Charlie Hamm comencèren er estudi.
Entà hèr er estudi era equipa de Hamm analizèc damb aqueres tecnologies un tròç dera maishèra quèrra deth cran de Tristan Otto, eth tiranosaure descorbit en 2010. Era tomografia ajudèc a dar informacion sus eth teishit qu’auie auut aguest especimèn e tanben se auie patit quauqua malautia. “Auíem era idia qu’ua tomografia podie ajudar plan es paleontològs sense mauméter guaire eth cran, çò digueren es cercaires”.
Eth descorbiment d’ua malautia des uassi
Totun, qu’era tecnologia utilizada entà estudiar aqueth tròç de cran deth tiranosaure pemetec tanben un estudi des dents deth reptil d’un biais fòrça mès prigond. Siguec atau quan i auec era suspresa, pr’amor qu’es dents èren fòrça mès flaques de çò que se podie demorar. Era tomografia confirmèc que i auie fòrça mès fluorina ena maishèra, çò qu’ei restacat, normauments damb ua menor densitat dentau.
Aquera fluorina suggerie qu’aqueth especimèn de tiranosaure auie patit ua grèva malautia des uassi, aué coneishuda damb eth nom d’osteomieilits tumefactiua. “maugrat qu’açò non deuie èster ua espròva scientifica, aguesta analisi permetec trapar naua informacion sus aqueth especimèn de tiranosaure, çò diguec Hamm. E ajudèc fòrça ara ora d’auer mès informacion estructurau e molecular sus Tristan Otto. Eth resultat non ère demorat pes paleontològs pr’amor que siguec descorbida ua malautia des uassi deth carnivòr”.
E ara, dempús de confirmar que damb aguestes naues tecnologies se pòden trapar fòrça causes naues en mon dera paleontologia, coma es malauties, eth cran de Tristan siguec amiat tornarmai ath Musèu dera Natura de Berlin. “Ara auem era esperança de hèr mès descorbiments damb aquera tecnologia, çò diguec Oliver Hampe, paleontològ d’aqueth musèu alemand. Non sabíem que podíem arribar a descorbir aqueth tipe de causes, com malauties”. Es cercaires presentèren es resultes d’aquera analisi en eth 2021 Annual Meeting of the Radiological Society of North America.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
