ES DESCOBÈRT UN PTEROSAURE GIGANTÀS EN ARGENTINA
Se fins ara los estatsunitencs èran los solets que podián afirmar qu’avián una de las espècias mai grandas de pterosaure de la planeta, lor temps es finit. Pr’amor qu’en Argentina foguèt descobèrt lo fossil d’un pterosaure gigantàs: Thanatosdrakon amaru, gaireben tan gran coma lo ja mitic Quetzalcoatlus.
Segon los paleontològs argentins demorèron estonats quan poguèron confirmar las mesuras d’aquel pterosaure fossil; tan gran coma un autobús actual, çò que convertís Thanatosdrakon en la segonda espècia mai granda de pterosaure de la planeta. Dragon de la Mòrt (la revirada del sieu nom) visquèt al continent american meridional fa aperaquí 86 milions d’annadas e l’envergadura de las siás alas foguèt d’aumens 9 mètres de longor.
Un pterosaure dels Andes
“Foguèt una espècia de pterosaure semblanta a una girafa, çò diguèt Leonardo Ortiz, paleontològ. Es tan gran qu’es estonant pensar scientificament qu’un animal aital poguèt jamai volar pendent lo passat”. Thanatosdrakon foguèt trapat al Andes, ont demorèt fa 86 milions d’annadas. Lo fossil foguèt descobèrt per una còla de paleontològs argentina dirigida per Leonardo Ortiz en l’an 2012. Pasmens, poguèt pas èsser confirmada la sieuna classificacion biologica fins a a ongan.
Lo nòm causit en latin e grèc, Dragon de la Mòrt, semblava li balhar justícia al pterosaure, çò apondèron los paleontològs, car foguèt vertadierament lo dragon de la mòrt d’aquela epòca. Segon los cercaires, Thanatosdrakon foguèt una de las primièras espècias de pterosaure qu’utilizava las sieunas alas per caçar, plan abans qu’o faguèron los aucèls. Pasmens, Ortiz confirmèt que pesava tan que demorava la majoritat del temps en tèrra.
Lo fossil d’aquel pterosaure gigantàs amassava los òsses de dos especimèns diferents. Aquò fa sospechar los cercaires que, çò de mai segur, es que demorèsse en grops. Thanatosdrakon visquèt 20 milions abans de la casuda del meteòr Chicxulub, que provoquèt l’extincion massiva dels dinosaures mas tanben dels pterosaures a la planeta blaua. De soslinhar, tanben qu’un autre pterosaure gigant e que visquèt plan abans que Thanatosdrakon, foguèt trapat a l’illa d’Skye, en Escòcia, en 2017. L’envergadura de las siás alas, pasmens, arribava sonque als 2,5 mètres.
La Redaccion
