Segontes era Audiéncia Nacionau espanhòla, eth recors que presentèc era Comunautat Autonòma de Cantàbria non ei bon, e donques demore totauaments proïbit caçar mès lops des de aguesta setmana en estat espanhòu. Entàs jutges, aquera caça poirie provocar un mau terrible que dempús non poirie èster apraiat, mentre que eth mau patit per elevatge uman pòt èster apraiat de manèra economica damb ua indemnizacion.
Ei atau com era Audiéncia Nacionau espanhòla decidic refusar eth recors de suspension demanat pera Comunautat Autonòma de Cantàbria e includir eth lop en listat ministeriau espanhòu dera Transicion Ecologica d’Espècies damb Proteccion Especiau. E que non pòden èster mès caçats. Era decision arribèc aguest deluns en tot èster rebrembat qu’aquesta decision ei ua modificacion dera lei e qu’establís jurisprudéncia d’una manèra clara entà arrestar maus que dempús non poirien èster apraiats.
Damb era suspension d’aquera orde, çò digueren es jutges, eth lop poirie èster caçat en Cantàbria e donques açò provocarie un mau que non poirie èster apraiat dempús. Se er elevatge uman patís maus peth lop se pòt apraiar damb ua indemnizacion economica. E er interès generau serie eth mès important entara conservacion dera espècia, mès qu’es possibles maus economics.
Era autonomia cantabra contra eth Ministèri
Segontes eth govèrn de Cantàbria, contunhar damb era caça deth lop non provocarie era fin dera sua superviuença en aquera comunautat, pr’amor qu’eth lop ja ei considerat com ua espècia protegida. Pr’açò demanèc era suspension dera decision iniciau deth govèrn espanhòu de non caçar mès eth lop en estat espanhòu. Eth pròpi president d’aquera comunautat demanèc acabar damb era suspension dera caça deth lop en tot criticar es idèes “iperecologistes” dera ministra dera Transicion Ecologica nacionau pr’amor “que non coneish arren sus era realitat des pòbles».
Totun, eth govèrn espanhòu ère contrari ad aguesta suspension dera caça deth lop pr’amor que non ère cap envasion des competéncies cinegetiques des comunautats autonòmes pr’amor qu’era proteccion der environament ei un ahèr de competéncia unica der estat espanhòu. Aquera demanda de suspension dera caça siguec tanben demanada pera Confederacion d’Ecologistes en Acción-CODA e era Asociacion entara Conservacion e Estudi deth Lop Iberic (ASCEL).
D’un aute costat, era pròpria Audiéncia nacionau espanhòla arreconeishec qu’encara i a recorsi pendents contra aquera decision judiciau des Comunautats de Galícia, Astúries e Castelha-Leon, Andalosia e tanben Madrid e Múrcia. Ara era comunautat de Cantàbria que vò presentar un darrèr recors de reposicion dauant dera Audiéncia Nacionau pr’amor que non ei bric d’acòrd damb aquera decision que poirie sauvar era vida ath lop coma espècia en nòrd espanhòu.
Segontes eth govèrn de Cantàbria refusen eth chantatge deth govèrn espanhòu en tot unir acceptar aquera decision damb era arribada de hònts economiques destinades entara proteccion deth lop e es indemnizacions entàs elevaires. Entàs cantabres “non ei ua qüestion de sòs mès de gestion d’un conflicte sociau contrari as comunautats autonòmes qu’ajudèren a sauvar enquiara eth lop iberic, e es pagesi que viuen en es pòbles, que demoraràn atau desbrembats deth govèrn”.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
