ENVIAR D’ELECTRICITAT SOLARA DE L’ESPACI ESTANT
La tecnologia actuala es a mand de permetre la recepcion d’electricitat solara de l’espaci estant. L’Institut Californian de Tecnologia, conegut internacionalament coma Caltech, a confirmat que se pòt ja recebre d’electricitat de l’espaci estant. O demostrèt fa gaire.
Tot auriá començat en 2011, quand Caltech comencèt lo programa Shape Solar Power Project (SSPD). Uèi, dotze annadas apuèi, aquela prestigiosa universitat privada a pogut demostrar que se pòt recebre d’energia electrica de l’espaci estant. Ne caliá far la demostracion. E foguèt lançat SSPD-1.
Segon Ali Hajimiri, codirector de l’SSPP, « fins ara s’èra pas jamai demostrat que se podiá produire d’energia de l’espaci estant sens fils. Nosautres o avèm fach d’un biais economic e amb d’estructuras leugièras e flexiblas e tanben amb de circuits pròpris integrats ».
Un viatge a travèrs d’ondas electromagneticas
Aital, l’energia es mandada a travèrs d’ondas electromagneticas. Sus la Tèrra foguèt recebuda l’energia e puèi amb aquesta poguèron far foncionar doas lampas led. Tot foguèt enregistrat amb vidèo. Puèi se celebrèt al campus de Caltech, pr’amor qu’èra estada una bèla capitada.
Ara, Caltech auriá per tòca de tornar dins l’espaci per far mai de provaments. E ansin poder confirmar que se pòt bastir una centrala solara fòra de la Planeta Blava. Almens a Caltech dison ja que la tecnologia es estada creada e que, ara, sonque cal bastir la quita centrala solara espaciala per començar de recebre d’energia de l’espaci estant.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
