Los cercaires trobèron quiòc, que las plantas an un sistèma de comunicacion quantica en tot utilizar de biofotons. Aquò arribèt après analizar los flacs senhals emeses per de lentilhas quora naisson e poguèron espepissar que lo senhals son pas fruch de la casualitat. L’estudi foguèt realizat per de cercaires del laboratòri de Fisica Nucleara de Frascati, lo pus grand de l’estat italian e situat al sud de Roma.
Segon los cercaires, las lentilhas emeton una pichonèla radiacion qu’es tanben un sistèma de comunicacion entre las plantas. Son de legums qu’emeton aqueles senhals permanentament, malgrat que sián de senhals plan flacs. Son utilizadas de particulas de lutz per se comunicar, tanben coneguts amb lo nòm de fotons. Pels cercaires aqueles senhals poirián aver de senhals quantics pas coneguts fins ara per la sciéncia.
“Aquò es sonque lo començament, mas sembla qu’es un sistèma plan interessant, çò diguèt Cătălina Curceanu, una de la cercaires de l’estudi ». Un estudi qu’es estat publicat al numeric Entropy.
Lo mond dels biofotons
I a d’organismes que se comunican a travèrs de la lutz. La medusa es un animal qu’o fa. Tanben los campairòls e los vermes de luzt que lançan de lutz per far fugir lors enemics. E qualqunes d’aqueles senhals son plan flacs, tanben coneguts amb lo nòm de biofotons.
Malgrat que descobèrts en 1923 per Alexander Gurwitsch, poguèron pas èsser espepissats pel primièr còp fins a l’an 1954. Uèi i a pas ja cap dobte suls biofotons mas encara i a de cercaires que son pas d’acòrd a l’ora de reconéisser se las lentilhas e d’autres organismes los utilizan per se comunicar.
Cossí que siá, los biofotons son d’electrons excitats pendent cèrts processes de reaccion quimica de las cellulas. Après atener mai d’energia, tornan puèi a un estat de repaus e lançan un foton. En de granas coma las lentilhas aquelas reaccions se debanan, mai que mai, pendent la fasa de germinacion.
La sciéncia confirmèt fa pas gaire que las plantas pòdon se comunicar a travèrs de cèrtas substàncias quimicas e encara amb d’ultrasons. Son usats per contrarotlat la creissença o encara avisar d’autras plantas sus cèrt dangièr que pòt arribar lèu o encara per atraire d’insèctes. Totun, es un procés pas gaire comprés encara uèi lo jorn.
La còla de cercaires, dirigida per Maurizio Benfatto, poguèt doncas espepissar un caissa amb 75 granas de lentilha qu’emeteron un senhal pro fòrt per poder èsser mesurat. Pels cercaires aqueles senhals an cèrtas proprietats quanticas car los fotons sonque pòdon existir dins un níbol de desparièrs estats possibles de la matèria tanben conegut amb lo nòm de superposicion quantica.
Quora donèron d’aiga a las granas los biofotons cambièron plan. D’en primièr los fotons avián lo meteis ritme. Puèi, adoptèron un nòu patron pus complèx nomentat movement brownian fraccional. E pr’amor d’aquò los scientifics creson qu’aqueles senhals son per se comunicar. En mai d’aquò, tanben creson que la segonda fasa d’aquel tipe de comunicacion poiriá èsser quantica amb l’ajuda de matematicas.
Segon Benfatto, son de senhals coerents quanticament e que pòdon ensenhar lo camin a la grana per germinar. « Se debana quicòm, çò diguèt Curceanu, mas qué es, es pas encara conegut ».
Ara los cercaires an la tòca de tornar a mesurar aqueles senhals amb d’instruments que pòdon los trobar fins a 100 còps mai e aital aver un senhal pus clar. Pasmens, demorarà sens se conéisser encara cossí afecta la mecanica quantica els èssers vius. Mas aquò ajudarà, de segur, a comprene melhor la comunicacion vegetala.
La Redaccion
