Un nòu estudi confirma que los paires son estats mai vielhs que las maires dempuèi la naissença de nòstra espècia. Los cercaires analizèron donadas geneticas de fins a fa 250.000 ans. E trobèron que los òmes son estats mai vielhs que las femnas a l’ora d’aver filhs dempuèi fa milièrs e milièrs d’ans.
Segon aquel estudi los òmes an agut totjorn de filhs mai tard que las femnas. E aquò se repetís un còp e autre al long de l’istòria mas tanben pendent la preïstòria umana: la mejana de mai de set ans entre òmes e femnas es una chifra constanta en nòstra espècia dempuèi aumens fa 250.000 annadas. E aquò vòl dire qu’aquela diferéncia s’es debanada dempuèi la naissença coma espècia ominida.
Fins a uèi los estudis scientifics sonque avián pogut arribar fins a fa 40.000 ans. E la mejana entre òme e femna demorava en sonque 2,3 ans. Mas ara una còla de cercaires de l’Universitat de Bloomington, en Indiana, poguèt analizar aquesta qüestion fòrça mai enlà. En tot estudiar las divèrsas mutacions geneticas de cada generacion umana.
Pas gaire enfants patiguèron mutacions geneticas al long de totes aqueles milièrs d’ans. Semblariá èsser que, se lo paire es mai vielh, i a mai de mutacions geneticas. Un paire mai jove balha pas gaire mutacions. Qualcunas donadas per far aquela analisi genetica avián coma origina mai de 1.500 islandeses que visquèron al long de sonque quatre generacions. Mas las nòvas tecnologias ajudèron a situar quora se debanaban aquelas mutacions e perqué. Puèi estudièron mai donadas amb de genòma de personas de tota la planeta (personas vivas).
Una mapa genetica nòva
Pr’amor d’aquò los cercaires podèron crear una mapa genetica de l’umanitat durant los darrièrs milièrs d’ans, fins a ara fa 250.000 ans. Los scientifics descobriguèron que l’edat mejana a l’ora d’aver un filh foguèt de 26.9 ans. Aquò dempuèi fa 2.500 sègles. Mas a l’ora de desseparar aquela chifra pèr sèxes tanben descobriguèron que l’edat femenina èra desparièra: los òmes avián de filhs a l’edat de 30,7 ans de mejana e las femnas los avián amb sonque 23.2 ans. Lo modèl venguèt alara permanent.
Aquò vòl dire que los òmes pòdon aver filhs mai tard que las femnas e que, pr’aquò benlèu causison aquò far mai tard. E doncas son paires mai tard que las femnas. Los cercaires tanben poguèron confirmar que la pression sociala suls òmes, pr’amor del patriarcat, provòca que primièr cal aver una seguretat economica abans de se maridar o aver de filhs. Ara es lo moment per discutir aquela analisi car pas totes los cercaires i son d’acòrd.
La Redaccion
