D’ANCESSORS D’OMINIDS (2): UN NÒU MOND
Quand lo continent african s’amassèt al continent euroasiatic fa d’aperaquí 17 milions d’ans una part dels descendents dels proconsuls, justament los genres Dryopithecus e Ramapithecus, conquistèron las nòvas tèrras e trinquèron, fin finala, la linha evolutiva de lors ancessors. Serián aquestas espècias que començarián una dralha evolutiva nova que menaria, fòrça puèi, als ancessors dels umans.
Mentretant la planeta patiguèt un aument de l’ariditat, qu’entraïnèt l’extincion de la majoritat dels ominoids del Miocèn, aumens al Vielh Mond. La causa dirècta ne foguèt un airal amb de forèsts tropicalas fòrça mendre qu’abans. Aquò provoquèt que tornèssen a demorar isolats tornarmai en Africa e sonque qualqu’unas regions d’Asia. Aicí evolucionèron fins venir gorillas en Africa, a mai de chimpanzés e umans, e de gibons e orangotans en Asia. Los ominids èran a mand de nàisser.
D’ancessors dirèctes
Fins fa sonque 14 milions d’ans lo primats que i aviá a la planeta poguèren subreviure pr’amor del tipe de vida qu’avián: suls arbres. Totun, lo nòu biais de clima entraïnèt l’abandonament de la selva e la marcha vèrs la sabana, ont podián pas manjar d’èrba e mens encara caçar. Son de primats que lors rèstas pus ancianas foguèron trobadas en Índia, pas en Africa, mas que visquèron en Euròpa, Africa e tanben Asia. Val pas dire que son de monards que ja an una marcha bipèda, consequéncia de lor adaptacion al nòu mond. Sonque una melhor vision poiriá los avisar dels nous dangièrs que devián faciar.
Kenyapithecus foguèt l’espècia ancestrala mai restacada amb los ominids. Demorèt en Africa fa 14 milions d’ans e ja aviá una capacitat craniana de 300 cc, d’adaptacion als òsses de las mans per poder marchar sul tèrra e un nòu tipe de dents. Lo temps que vivián fins èsser adults èra mai long e pr’açò caliá una melhor proteccion sociala pels pus joves. Aquò seriá una caracteristica clàssica de totas las espècias inclusas dins lo procès nomenat d’ominizacion. Kenyapithecus s’espandiguèt per defòra d’africa e foguèt la grana de l’origina dels ominids.
Una de las regions de la planeta qu’a un melhor registre fossil d’aquesta epòca (coma Occitània l’a del Paleolitic Mejan e Nòu) es Catalonha. La cronologia fossila d’aqueste país se situa entre ara fa 23 e 5 milions d’ans, durant lo Miocèn ( e quand arribariá l’epòca dels grand ominids d’Africa).
L’estudi realizat pendent los darrièrs tempses del ominoids d’Eurasia en Catalonha ajudèt plan a comprene las espècias ancessoras d’ominids. En Eurasia son estadas trobadas 13 espècias ominoidèas e 5 foguèron trapadas en Catalonha. Aquò confirmariá l’existéncia de dos grands grops de monards qu’aguèron, al còp, una posicion drecha. E ambedos patiguèron aquela evolucion de manièra independenta, en Africa e en Euròpa.
A mai, en Catalonha tanben i demorèron fa 13 milions d’ans los driopitecids o monards de bòsc, que patiguèorn l’extincion fa 5 milions d’ans e que serián evolucionats dels keniapitecids. Un grop foguèt l’ancessor dirècte de gorillas, chimpanzés e umans. L’autre o foguèt dels orangotans. Tot aquò fins qu’arribèt una nòva espècia: Pierolapithecus catalanunicus, que demorèt dins la forèst de çò qu’uèi es Catalonha ara fa 13 milions d’ans.
La Redaccion
