La preséncia d’aperaquí un 2% d’ADN neandertalian dins lo genòma uman actual non african menèt de cercaires a estudiar se i aviá qualque escasença de crosament genetic entre espècias sens sèxe. Es çò qu’ara an descobèrt de cercaires de Niça segon d’informacions publicadas dins la revista numerica Nature. Segon aquel nòu estudi, i a un biais, fins a uèi desconegut, de crosament genetic d’ADN entre doas espécias sens relacion sexuala.
Cossí es possible, aquò? Los cercaires Gianni Liti, Melania Jennifer D’Angiolo e Matteo de Chiara poguèron confirmar scientificament cossí se debana aquel incresible procès d’escambi genetic. Segon aqueles scientifics, dos individús que son geneticament alonhats se pòdon transmetre d’informacion genetica après la naissença de descendéncia a travèrs del sèxe. Aquò es conegut coma introgression genetica (transmission genetica a travèrs d’una ibridacion). Mas tanben sens aver de relacion sexuala.
Alavetz, quand nòstra espècia sortiguèt d’Africa, çò que trapèt en Euròpa foguèron d’èssers umans plan luènh geneticament de nosautres, los neandertalians. A travèrs del sèxe e de l’introgression genetica i aguèt una transmission mutuala de gèns. Mas tanben nos podèm demandar se i aguèt jamai un crosament genetic entre nòstra espècia e la neandertaliana sens sèxe?
Per ansin, la còla de cercaires niçards dirigida per Gianni Liti, de l’IRCAN (Institute for Research on Cancer and Aging) de Niça, a descobèrt un fach tras qu’estonant: lo crosament genetic entre espècias es possible e d’efièch tanben seriá un factor de mai dins lo passat a l’ora de parlar d’aquel crosament genetic entre diferentas populacions umanas preïstoricas.
Un factor espectaclós
La causa ne seriá la levadura, mai que mai la levadura de fornièr nomenada Saccharomyces cerevisiae e son espècia sòrre Saccharomyces paradoxus. “Son doas espècias de levadura que se pòdon amassar e mai crear una forma ibrida de levadura coneguda amb lo nom d’S. cerevisiae/S. Paradoxus, çò an confirmat los cercaires. Lor divergéncia genetica pròcha d’un 12%, pasmens, empedís una descendéncia viabla e i a una limitacion del crosament genetic”.
Aital los cercaires an trapat de tròces d’ADN d’S. paradoxus dins lo genòma de S. cerevisiae, dins çò que poiriá èsser un procès semblable a l’introgression que i aguèt entre de neandertalians e nòstra espècia. Mas que se passa se l’ibrid es esteril? Aquò tanben es estat analisat pels cercaires, qu’an estudiat de levaduras fossilas d’S. cerevisiae , una levadura que i a uèi dins l’aiga utilizada per la produccion d’òli.
“Çò qu’avèm descobèrt es que los cromosòmas d’aquela levadura fossila son parièrs als luòcs ont l’ADN d’S. paradoxus remplacèt lo d’S. Cerevisiae”, çò apondèron. Dich d’un autre biais: aquò permetriá a l’espècia ibrida de dominar l’infertilitat genetica. E doncas los descendents d’aquela levadura fossila aurián patit una retrogression genetica en tot donar naissença a de descendents amb de longs tròces d’ADN de las doas espècias de levadura. Aquò meteis, aplicat al camp de la genetica umana, dobrís una nòva e fenomenala pòrta d’un ponch de vista scientific car poiriá implicar que nòstra espècia e encara d’autras aurián pogut far d’escambis genetics sens aver de relacion sexuala.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
