AMASSADA PEL GALÒ
L’amassada de futurs parlaires d’una lenga pas oficiala de l’estat francés coma lo galò, una de las doas lengas qu’a Bretanha) es pas un fach comun. Mas arriban de bonas notícias sus l’amassada de desenats d’escolans de divèrsas centres educatius de Bretanha que decidiguèron passar lo jorn al torn de la polida lenga galò. L’activitat foguèt una iniciativa de Cllâssiers, un organisme que dòna sosten a la difusion e coneissença del galò fa d’annadas.
Per ansin, los escolans de las escòlas Admézë (d’escòlas ont i a de corses de galò de manièra jornalièra) de la Val d’Izé son ja 35, a mai de 22 de La Chèze . La setmana passada se rescontrèron per celebrar una jornada dedicada al galò. 
I aguèron divèrsas activitats per los escolans coma far un questionari, e una passejada al torn de l’estanh del castèl de La Chèze per descobrir la flora del luòc, totjorn amb l’usatge de la lenga galò. Aquela passejada se faguèt jos la direccion d’André Le Coq.
Puèi, i aguèt un talhièr a la ràdio amb Gaël Squiban, que foguèt una bèla escasença per aqueles mainats e mainadas per descobrir tot un nòu mond e totjorn a travèrs de la lenga galó.
Un espectacle estonant
A mai, e aprés manjar, se passèt l’espectacle Ujène. Tot aquò se debanèt al costat dels escolans d’autres dos centres educatius, lo Saint-Barnabé, ont tanben son aufrits 15 minutas cada jorn en lenga galò als escolans, e l’escòla la Motte. Apuèi aquela amassada totes volguèron felicitar los mèstres Christophe Brillet e Anita Rouault (qu’apartènon a Cllâssiers) e totas las personas qu’ajudèron a la celebracion d’aquela tras que polida jornada.
L’amassada se celebrèt totjorn per aufrir als escolans l’escasença de parlar e escoltar galò. Cal rebrembar que lo galò es una de las doás lengas parladas dins Bretanha amb lo breton. E aquò quand encara fòrça genta pensa qu’es un dialècte del francés. Pasmens, es estada reconeguda coma lenga de Bretanha amb lo breton dempuèi l’an 2004. La fondacion de l’associacion Amics del Galò en 1976, puèi Bartaèyn Galeizz e Maèzoe balhèt una nòva vida a una lenga millenària encara ara parlada per una minoritat de la populacion bretona. E pendent de tempses mai recents lo galò a un reviscolament escolar sustot per d’associacions coma Cllâssiers, que fan un trabalh pel galò tras que polit e que dòna fòrça espèr al futur d’aquela lenga bretona latina.
La Redaccion
