LO TRAMVAI D’IDROGÈN COMENÇARÀ EN 2028
Lo tramvai d’idrogèn de la vila d’Ulsan, en Corèa del Sud, serà un dels primièrs tramvais d’aquel tipe sus la planeta e començarà de foncionar de l’an 2028 enlà. Aquel tramvai d’Uslan, una vila situada a 300 km de Seol, que son carburant serà l’idrogèn, serà doncas un tramvai que poiriá revolucionar totalament l’istòria dels transpòrts del Mond en tot ajudar a espandir la mobilitat urbana mas ara d’un biais ecologic.
Car lo tramvai d’idrogèn sonque emetrà de vapor d’aiga e per aquela rason ajudarà fòrça a reduire las emissions de gas d’efièch de sarra. De remembrar que i aguèt un investiment de fins a 23,5 miliards de wons sud-coreans (16 milions d’èuros) amb la tòca d’entamenar una transicion energetica reala e sostenibla. Lo projècte ja es estat confirmat per la comuna d’Ulsan.
L’idrogèn, la solucion definitiva?
Ulsan, en Corèa del Sud, ven ara doncas una de las primièras vilas de la planeta que vòlon començar la transicion vèrs l’energia neta e ecologica e pas sonque al nivèl nacional mas tanben al nivèl mondial. Pr’amor d’aquò lo tramvai fonciona amb d’idrogèn. Lo projècte veirà la lutz en 2028 e poiriá èsser revolucionari pr’amor qu’es una avançada ecologica plan important al nivèl dels transpòrts publics: ofrís d’efièch una responsa que considèra l’environament coma tòca primièra.
Amb aquel tramvai, la Corèa del Sud es ara, amb China e Malàisia, un dels primièrs païses del mond a investir dins de de transpòrts publics ecologics. A l’ora d’ara, lo tramvai es en fasa de provaments e serà conegut amb lo nom de tramvai ART (Transit Autonòm Rapid, segon sa sigla anglesa) en Malàisia, e es estat confirmat que serà bastit per la societat chinesa publica de camins de fèrre. Serà ja operatiu a comptar de 2025.
En mai d’aquò, es estada organizada una presentacion del tramvai verd en collaboracion amb l’entrepresa Hyundai Rotem, que fabricarà lo prototipe. La tòca es d’ajudar los ciutadans a descobrir lo potencial del tramvai d’idrogèn e de poder aital intrar dins una nòva edat del transpòrt public sus la planeta.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
