CONFIRMEN ERA DIVERGÉNCIA EVOLUTIVA ENTRE PRIMATS AFRICANS E ASIATICS
Divèrsi paleontològs chinesi e americans an publicat en eth jornau Science era descobèrta d’ua fòrça anciana divergéncia entre primats africans e asiatics pendent er Oligocèn ancian. Segontes aguesta còla scientifica es divergéncies s’aurien debanat pr’amor des desparietats ena temperatura e eth climat en es dus territòris.
Atau, eth registre fossil confirmarie que pendent es periòdes de mès calor i avien expansions des espècies de primats e que quan i avien periòdes mès heireds i avien mès extincions. Tot a demorat enregistrat en es fossils dera epòca de transicion entre er Eocèn e er Oligocèn- çò ei hè 34 milions d’ans.
“I aguec ua casuda de temperatures pendent aguesta epòca pr’amor qu’era desseparacion des plaques tectoniques siguec mès grana. –çò confirmèc eth co-autor der estudi Christopher Beard, dera Universitat de Kansas, Estats Units – E coma èren temps malaisits s’extinguiren en divèrsi lòcs dera planeta, coma America deth Nòrd e Euròpa, mès demorèren en d’autes coma Africa e Asia”.
Entà subervíuer, Beard e sòns collegues an trapat qu’es primats que demorèren en Asia adaptèren es madeishes tecniques de subervivença qu’avien adaptat es primats estrepsirrins, coma es lemurs. En China, lòc on s’an trapat aguesti fossils, an podut descurbir qu’es primats ancians èren fòrça similars as primats tarsians que demoren aué enes Filipines e divèrses isles indonesies. Fòrça semblant a aguesti ère er ancian primat Oligotarsius rarus.
Ua desseparacion totau enes linhes evolutives
“Segontes es fossils – çò diden aguesti scientifics – es tarsians demorèren un còp en Asia, en un lòc tan ath nòrd coma China centrau. Es dents d’aguesti fossils son semblantes as des tarsians d’aué. E aguesti son aué coma ua sòrta de fossils vius. En Afro-Arabia, totun, i a fòrça pòqui strepsirrins –coma es lemurs – e fòrça antropoids e aguesti son fòrça mès divèrsi”.
Pr’açò aguesti paleontològs cren qu’aguesta epòca siguec un episòdi fòrça important ena istòria dera evolucion pr’amor qu’aurie hèt impacte en tota era istòria dera evolucion des primats en l’Ancian Continent. Atau, es desparietats de temperatures aurien provocat ua desseparacion evolutiva totau e definitiva entre es primats asiatics e es africans. E aquerò siguec hè 34 milions d’ans.
Christian Andreu
