AVIÁ LOS PICHONS LIGATS AMB BORSAS
Una còla scientifica de la Universitat de Yale e lo Musèu Peabody d’Istòria Natural a descobèrt un fossil d’una creatura qu’aviá los pichons ligats amb ela fins qu’èran adultas en borsas. L’animal visquèt pendent lo Silurian, fa 430 milions d’ans, e aviá un metòde de criança unic en la planeta.
Aquilonifer spinosus, qu’es lo sieu nom, viviá a l’ocean amb divèrses autres animals coma espongas, braquiopòdes, vèrmes, aranhas de mar, estelas de mar e d’autres crustacis. Segon la còla scientifica qu’a fach la descobèrta, agueste animal non fasiá mai d’un centimètre de long e solament se n’a trobat un fossil en Anglatèrra, en Herefordshire.
Çô que fa unic Aquilonifer es qu’aviá fins a dètz petits ligats amb la maire a travèrs de borsas. L’estudi, publicat en la revista Proceedings of the National Academy of Sciences, confirma qu’èra un artropòd, un gròp d’animals que tanben includís aranhas, insectes e crustacis.
“Es crustacis modèrns utilizan divèrsas estrategias per protegir lors uòus e embrions dels predators – çò diguèt Derek Briggs, cap de l’estudi –coma aver las crias jos la sieuna clòsca o las protegir amb una borsa especial, mas aqueste metòde es unic en la Tèrra tota”.
Aital, Aquilonifer aviá los petits ligats amb borsas fins al moment qu’aquestas ja avián l’exoesqueleta pro desvolopada. L’animal non aviá pas d’uèlhs al sieu cap e aviá una estructura coma se foguèsse un escut. La descobèrta a fach analizar per quina rason aqueste animal fasiá aquò.
“L’adult podiá aver ofrit proteccion a las crias dels predators o los aluenhar del perilh – çò confirmèt Briggs -. Tanben podia los aver menat a de lòchs ont i aviá mai de noiridura. Coma qu’èran filtraires, çò es dire que chuclavan particulas de nutrients de l’aiga, benlèu solament l’adult aviá l’abilitat de s’orientar en las correntas marinas. Pr’aquò podiá ajudar e fòrça los petits”.
Christian Andreu
