L’an 1980 Ronald Reagan ganhèt las eleccions presidencialas als Estats Units. Lo partit republican tornava al poder amb un programa qu’utilizava lo lèma de la “Revolucion Conservadora”. Cal nos situar en lo contèxt del moment. Pendent los ans 1970, los Estats Units avián patida la crisi economica provocada per l’augment del prètz del petròli e la desfaita a la guèrra del Vietnam. La societat nòrd-americana aviá perduda la prosperitat economica e sociala del periòde 1950-1970 e lo sentiment generalisat èra d’incertitud e de decadéncia.
Ronald Reagan prepausava als sieus compatriòtas retornar als “principis qu’avián bastida la nacion”, mejançant lo retorn a una societat que defendiá aquelas idèas. Lo conservadorisme social e lo liberalisme economic tornavan. E lo messatge illusionèt la majoritat de la societat nòrd-americana.
Mai e mai iniciativa privada
Dins del domeni economic, èra defenduda totalament l’iniciativa privada e la reduccion drastica de la preséncia de las Administracions Publicas dins de l’economia, coma “aqueles patriotes de l’an 1776”, que comencèron la Revolucion Americana contra lo domeni britanic.
Lo nomenat “Estat del Benestar”, fòrça expansionat pendent las crisis dels ans 1970 èra redusit, e las politicas keynesianas que defendián lo protagonisme de l’Estat per superar los problèmas economics èran substituits per un neoliberalisme ont lo mercat deviá resòlvre aqueles meteisses problèmas. L’institucion familhala veniá lo refugi per aquelas personas que patissián una situacion economica complèxa.
Justament la defensa de la familha e la religion èran autras de las colomnas de l’ideologia del govèrn de Ronald Reagan e las glèisas tornèron a èsser emplenadas cada dimenge.
E sustot, la recuperacion de l’orgulh d’èsser nòrd-american, per poder superar lo traumà de la desfaita al Vietnam. La bandièra, l’imne, los personatges istorics, l’armada…. foguèron valorizats fòrça positivament dins la consciéncia collectiva de la populacion. Lo sieu successor George Bush contunhèt pendent lo sieu mandat amb aquela politica fins l’an 1993.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Fotografia principala: Diego Cambiaso_CC
