UNA GLACIACION PROVOQUÈT L’ESCANTIMENT DELS PRIMIÈRS OMININS EN EURÒPA
Un nòu estudi afirma que l’escantiment dels premièrs ominins que volguèron colonizar lo continent europèu, ara fa aperaquí 1,1 milions d’ans, aguèt coma causa principala lo clima extrèm d’una glaciacion. L’estudi es basat en de nòvas evidéncias paleoclimaticas ara descobèrtas: alavetz lo clima del sud d’Euròpa venguèt tan fred que provoquèt l’escantiment dels primièrs ominins arribats al nòstre continent.
Ara fa 1,1 milions d’ans una glaciacion s’espandiguèt plan per Euròpa. Fins a un nivèl climatic que las populacions omininas qu’en aquela epòca demoravan ailà poguèron pas resistir. Lo continent venguèt, pauc a cha pauc, vued, e lèu i demorèt pas cap d’ominin. D’ominins que benlèu ja fasiá mai de 300. 000 ans que i demoravan car la tròba pus anciana jamai trapada e restacada a d’ominins europèus a una edat d’1,4 milions d’ans, foguèt trobada a la peninsula iberica e suggerís que las primièras populacions d’ominins serián arribadas a Euròpa dempuèi lo sud-oèst asiatic.
Un clima insuportable
En aquela epòca lo clima èra mai caud mas tanben pus umid. Tanben i avián de periòdes mai o mens freds. Fins ara se cresiá que los primièrs ominins qu’arribèron a Euròpa avián pogut subreviure plan malgrat los cambiaments climatics que i aguèt e amb una màger adaptacion al clima europèu, almens des de fa 900.000 ans.
“Avèm descobèrt un episòdi glacial extrèm que se debanèt ara fa 1,1 milions d’ans e que cambiarà lo nòstre vejaire sus l’espandiment continú dels primièrs umans arribats a Euròpa, çò diguèt Chronis Tzedakis, del Collègi Universitàri de Londres”. En l’estudi, Tzedakis e d’autres cercaires analisèron la composicion de divèrses mircoorganismes marins e tanben lo pollèn que i aviá als sediments marins situats davant la còsta de Portugal.
La resulta foguèt trapar un cambiament radical del clima que finiguèt en un refrejament extrèm ont la temperatura mejana de luòcs coma Lisboa queiguèt a mens de 6 ºC e que provoquèt l’espandida dels desèrts, un prètzfach pro parièr a l’epòca actuala de cambiament climatic, çò apondèt Vasiliki Margari, cercaire de la meteissa universitat.
“Un refrejament coma aquel auriá situat los grops de caçaires-culheires en un estranci grand, mai que mai, quora los umans avián pas encara creat una adaptacion bona al freg (avián pas de ròba drecha nimai coneissián cossí far fuòc nimai trapar un bon refugi, çò diguèt Nick Ashton, del Musèu Britanic)”.
Los cercaires recreèron lo clima d’aquela epòca a l’ordenador”. La simulacion e divèrsas tròbas fossilas en Euròpa e Asia ajudèron a crear un modèl que confirmava quan temps avián los ominins demorat en un luòc. La resulta foguèt descobrir que fa 1,1 milions d’ans lo clima fred foguèt extrèm e provoquèt l’escantiment d’aqueles ominins, çò confirmèt Axel Timmermann, del Centre IBS pel Clima de l’Universitat de Pusan”.
Tota la peninsula iberica e lo sud europèu patiguèt l’escantiment general dels ominins qu’ailà i demoravan. I a pas cap pèira trabalhada pendent los 200.000 proplèus ans. Aquò confirmariá aquela teoria. “Segon aquò, çò diguèt Chris Stringer, del Musèu d’Istòria Naturala de Londres, Euròpa tornèt a èsser colonizada fa 900.000 ans per d’ominins mai resistents qu’avián cambiat la sieuna conducha e mai adaptats a las condicions climaticas glacialas extrèmas”. L’estudi foguèt publicat al numeric Science.
La Redaccion
