UNA COMPANHIA DESCONEGUDA GANHA MAI QUE FACEBOOK
E òc. Es una companhia desconeguda en Occident. Se nomena Tencent e es chinesa. En 2016 a ganhat mai de 500 bilions d’euros. Ja es pr’aquò estada considerada coma una de las cinc entrepresas mai grandas de la planeta. E aquò solament es lo començament.
Maugrat aver mai de 19 ans, Tencent es una companhia qu’aufrís de jòcs e un servici de messatjariá, WeChat, al mercat chinés. Ara es arribada a aver una valor de capital, la setmana passada, de mai de 530 bilions d’euros. Facebook es demorada al segond luòc amb solament 528,5 milions d’euros.
Aquelas chifras an coma causa la nauta participacion dels chineses als jòcs electronics – mai de 750 milions utilizaires -, las aplicacions de messatjariá e d’autres. Al mercat chinés las primièras entrepresas que balhan aquestes servicis son Tencent e Alibada, una autra companhia chinesa qu’es tanben entre las primièras.
La primièra companhia chinesa del club
Tencent seriá, amb aquelas chifras, la primièra companhia chinesa que dintrariá al club nomenat dels “miei trilions”. E lo prètz de l’entrepresa es mai del doble qu’ara fa solament un an.
Aquò mercés als servicis de divèrses jòcs de ròl numerics, coma Honour of Kings, que ja a mai de 200 milions d’utilizaires. Lo prètz de Tencent es ara aital que una inversion de 1000 dolars en
2004 ara costariá 1 milion de dolars.
De mai, los servicis de WePay, Alipay e Alibada tanben aurián ajudat e plan montar lo prètz de Tencent los darrièrs meses. La majoritat dels utilizaires utilizan aqueles servicis a travèrs lo telefonèt que ja i a mai d’un bilion d’smartphones en China uèi lo jorn. Segon una enquesta realizada fa pauc los mai vielhs – fins a 88 annadas – tanben aurián acceptat ben l’utilizacion de las nòvas tecnologias. “E mai lèu qu’en Occident”, çò diguèt Zhao Chen, director d’una companhia de Plug and Play en China.
Aital, d’entrepresas occidentalas coma Appel, Alphabet, Microsoft e Amazon tanben son grandas en China, mas patisson de restriccions a Internet per part del govèrn chinés. E aquò ajuda pas la sieuna economia.
Lo senhorejament de WeChat de Tencent auriá metut los competitors dins una marrida posicion, coma Apple, pr’amor que los telefonèts chineses pòdon pas dintrar dins lors servicis pr’amor que foncionan pas amb la maquinariá d’Apple. Tencent soleta auriá mai d’un bilion mensual d’utilizaires qu’utilizan servicis de messatjariá, premsa, pagament, de jòcs e publicacions. E Facebook solament n’a 2 bilions mensuals en tota la planeta.
La manièra de trabalhar de Tencent es desparièra de la d’Amazon o Facebook – basada en la publicitat – pr’amor que vendon simbòls e caractèrs dins los jòcs. Alibada, d’un autre costat, fa pagar las companhias que vòlon aver de publicitat als jòcs. Çò qu’es contrari a l’esperit capitalista de las entrepresas occidentalas.
La Redaccion
