UN SEGOND OBJÈCTE ESTRANH ENTRA AL SISTÈMA SOLAR
Apuèi la gigantassa discussion que i aguèt dins la comunautat astronomica en 2017 sus la natura de la cometa Oumuamua (que Sapiéncia ja ne raportèt en aquel moment) ara una còla d’astrològs confirmèt l’arribada al Sistèma Solar d’un segond objècte mobil estranh. L’objècte es estat nomenat 2l/Borisov e es considerat, fins ara, tant estranh coma lo primièr.
La cometa 2l/Borisov foguèt descobèrta pendent doas nuèchs de setembre. L’observacion se produsiguèt amb lo telescòpi William Herschel de las Illas Canàrias e lo telescòpi Gemini Nòrd, situat a Hawaii. Ambedoas observacions, realizadas al còp, confirmèron qu’a una coa de gas darrièr e que contunha de dintrar dins lo Sistèma Solar dempuèi alara.
Semblariá èsser, segon de donadas publicadas aquesta quita setmana al numeric Nature Astronomy, que 2l/Borisov se mòu coma se foguèsse una cometa abituala, mas qualqu’unas caracteristicas fan lo semblar parièr a Oumuamua, que dintrèt al Sistèma Solar en l’an 2017.
Segon los cercaires, 2l/Borisov auriá coma origina Cassiopèa e auriá una coa de gas darrièr. Seriá un pauc mai pichon qu’Oumuamua pr’amor que fariá d’aperaquí 2 quilomètres de long. Totun, que seriá pas encara estat classat segon sa forma per fauta de mai donadas scientificas. Los cercaires, en mai d’aquò, confirmèron que se seriá situat, quora mai pròcha a la Tèrra, a sonque 1,9 unitats astronomicas e qu’aquò se debanariá mai o mens pendent la fin d’ongan.
De meses per l’observar
Aquò ajudariá plan los scientifics, car 2l/Borisov, a diferéncia d’Oumuamua, poiriá èsser observat e estudiat durant divèrses meses e doncas se pensa que ne poirián aver mai d’informacion scientifica e d’un biais mai prigond. Pel moment vòlon pas predire quala será la dralha cosmica que seguirà car Oumuamua, quora prèp de la Tèrra cambièt de manièra estonanta sa trajectòria e se n’anèt del Sistèma Solar lèu lèu.
“Pensèm que 2l/Borisov poiriá èsser estudiat melhor, çò diguèt un dels autors d’aquel estudi, Michal Drahus, astronòm de l’Universitat de Cracòvia, a Polonha. Ça que la, ara podèm confirmar qu’Oumuamua foguèt un objècte tras qu’estranh. Cal conéisser la forma e la velocitat de 2l/Borisov e tanben assajar de saber quala es la sieuna composicion quimica, que semblariá èsser facha de gas de cianogèn (d’atòms de carbòni e nitrogèn). Un fach qu’es pro comun dins las cometas del Sistèma Solar”.
La Redaccion
