La botanica qu’estimè que suu planeta Tèrra e i avèva 390.000 plantas. L’estudi qu’estó realizat en 2016 per ua equipa de botanistas deus Jardins Botanics Reiaus deu Kent, Anglatèrra. Aqueth estudi qu’estó de tira considerat com la purmèra lista scientifica de tota la flòra mondiau.
Enlà d’aquò, aqueths botanistas qu’amassèn tanben donadas hèra interessantas, en 2015, 2023 navèras plantas qu’estón descobèrtas. Au demiei de totas aqueras plantas que compta lo planeta, 21% e son miaçadas d’extincion pr’amor deu cambiament climatic au nivèu mondiau, la pèrda d’abitat, las malaudias e las espècias invasivas.
“Qu’èra hèra important de conéisher lo nombre exacte de plantas que i avèva sus Tèrra – çò digó Kathy Williams, directora deus Jardins Botanics Reiaus -. Ara que sabem on son aqueras plantas, las lors relacions dab d’autes grops e quin pòden ajudar los umans. Un hèit essenciau”
Que son la nosta medicina, minjar e ajuda
Aquò ei ua causa qui’s pòt dedusir d’aqueth estudi. Las plantas qu’estón classadas segon quin nse pòden ajudar per la medecina, minjar e tanben peu lor contròle deu climat planetari. Totas aqueras donadas que podón confirmar scientificament, dab l’ajuda de l’informatica, totas las informacions qu’aqueth organisme avèva de las plantas.
390.990 plantas shens includir algas, camparòus e líquèns. D’aquestas, 369.400 que son flors. Mes tot aquò n’ei pas arren, que’ns disen los scientifics, n’ei pas sonque ua petita espandida de la coneishença que podem aver de las plantas. Sovent, que i a navèras descobèrtas, com la d’un arbó que hè mei de 45 mètres de haut au Gabon, Africa, aperat Gilbertiodendron maximum. O ua navèra espècia de Begònia o de ceba, de planta carnivòra, com la Drosera magnifica, trobada i a drin au Brasil.
L’estudi qu’avèva tanben com prètzhèit de poder conéisher quinas èran las espècias invasivas, on demoravan e quin se podèva lutar contra eras. Que n’i a 4979 en tot, un 5% deu totau e ara los botanistas qu’an ua mapa qui serà renovelada anuaument entà lutar contra aqueth tipe de plantas d’un biaish racionau.
La Redaccion
