REALITAT O SIMULACION INFORMATICA
Ja avèm dich mai d’un còp que i a estudis que son estonants e que las sieunas resultas pòdon provocar mai que debat dins la comunautat scinetifica mondiala. Aqueste seriá lo cas d’un nòu estudi realizat per Melvin Vopson e ua còla de cercaires de l’Universitat de Southampton, que qüestiona la realitat ont demoram e prepausa que, benlèu, es pas aital, e que poiriam viure dins una simulacion informatica, cossí apuntava un filme fa pas gaire temps.
E aquò arriva quan l’ipotèsi que prepausa de mai en mai viure dins un univèrs simulat ganha mai de basa scientifica. Aital o confirmarián cèrtas descobèrtas dels darrièrs tempses. Sonque la segonda lei de la dinamica de l’informacion ja poiriá entraïnar dobtar de la nòstra realitat e far pensar que vivèm dins una ralitat artificiala a granda escala.
L’informacion, una sòrta de matèria
Ja en 2019 Melvin Vopson, de l’Universitat de Southampton introduisèt un nòu principi de compreneson de l’existéncia en tot suggerir que l’informacion a una massa. D’efièch la segonda lei de l’infodinamica demòstra que l’entropia dels sistèmas d’informacion pòt venir mendre e aquò seriá contràri a l’entropia fisica actuala.
Aquò vòl dire que podèm viure dins una simulacion informatica, un fach tras qu’estonant, après aufrir una nòva vision sus la natura del meteis univèrs. Es aquò possible ? Podèm pensar que vivèm dins una simulacion informatica, uèi lo jorn ? malgrat que pòsca semblar absurd per fòrça de nosautres, aquesta es la dralha que fòrça cercaires comènçan a sospechar.
La fisica de l’informacion es la sciéncia que comènça a èsser populara dins la comunautat scientifica. Pas per çò que fins ara afirma, mas per çò que fa sospechar. Suggerís que la realitat fisica es constituïda per de bits d’informacion. Un concèpte introduït pel meteis Vopson e conegut coma principi « d’equivaléncia de la massa, l’energia e l’informacion ».
Segon aquel cercaire, l’informacion a una massa, e totas las particulas elementaras emmagasinan d’informacion per elas meteissas cossí fa l’ADN amb l’informacion genetica. En 2023 Vopson prepausèt una segonda lei de la dinamica de l’informacion que poiriá aufrir d’espròvas d’un Univèrs simulat.
Segon l’infodinamica, l’informacion pòt èsser mesurada e pòt influir la conducha d’un sistèma. La segonda lei de l’infodinamica a coma basa la segona lei de la termodinamica ; l’entropia d’un sistèma isolat pòt pas s’arrestar de créisser o demorar parièr amb lo temps. E los sistèmas d’informacion actuals son sonque de sistèmas fisics amb d’informacion.
Per ansin, los cercaires an trobat desparièrs biais d’emmagazinatge de l’informacion ; a travèrs de l’emmagazinatge de donadas numericas o a travèrs d’un genòma d’ARN. Amb lo primièr, l’entropia dels sistèmas creis amb lo temps. Totun, demòran en equilibri.
Aquesta lei pòt aver d’importantas repercussions en la genetica, la biologia de l’evolucion, los sistèmas de donadas o lo big data, e la cosmologia. Poiriá ajudar a prevenir mutacions geneticas.
Lo segond biais es sequenciar l’ARN. Vopson soslinhèt que la resulta del sieu estudi indicava una relacion entre l’informacion e la dinamica de mutacions geneticas. E l’entropia de l’informacion cambia a cada mutacion
La segonda lei de l’infodinamica, en mai d’aquò, sosten que las mutacions geneticas que seguisson un modèl contrarotlat per l’entropia de l’informacion son brica aleatòrias. E aquò fa d’aquesta lei una lei de besonh car demòstra que sèm en un univèrs infinit e en expansion contunha. Una lei que pòt explicar la simetria universala dels umans, animals, arbres, nèu, galàxias, etc. E aquò correspond a d’elements totjorn amb un nivèl d’informacion pus bas.
La conlusion es qu’ « una mendre informacion vòl dire optimisation de la meteissa ont es mai compresa » çò diguèt Vopson. Car, çò apondèt, se demoram dins un univèrs simulat, cal tanben un mecanisme de compression de donadas. E aquò balha de fòrça a l’idèia que vivèm dins una simulacion informatica que, pasmens, demòra encara d’èsser demostrada a nivèl empiric.
E, per poder aquò far, cal trapar los bits d’informacion que i a dins tota particula elementara. E aquò se poiriá far amb lo modèl de truc particula-antiparticula. « Quora trucan una particula e una antiparticula se produsís la sieuna destruccion final e doncas cal conéisser ont va l’informacion qu’an dins », çò contunhèt Vopson.
E çò que cal far ara, doncas, segon aquel cercaire, es confirmar l’existéncia de l’informacion coma cinquen estat de la matèria. Aquò seriá revolucionàri. E tanben poiriá èsser que l’informacion foguèsse aquela matèria escura (27%) de la densitat d’energia universal) encara pas descobèrta nimai demostrada en cap laboratòri fins a uèi lo jorn.
La Redaccion
