Fasiá fòrça temps que se podiá pas balhar una brava notícia sus lo comèrci illegal d’evòri d’elefants. Lo ritme del chaple actual de la populacion d’elefants africans es mai qu’alarmant mas òc, encara i pòt aver espèr: China confirma lo barrament de 67 obradors d’evòri en aquel país e lo prètz chinés del quilo d’evòri a queigut mai de dos tèrces en solament 30 jorns.
Las chifras son estadas confirmadas per l’organizacion de de proteccion dels elefants Save The Elephants. Èra una notícia fòrça necessitada per poder contunhar d’aver espèr en la pro reducha populacion africana d’elefants. Las donadas totun, arriban après se conéisser que Sestao II, un dels elefants kenyans mai ancians, grosses e estimats de tota Africa, es estat tuat recentament amb una sageta amb poison.
Mas òc, lo darrièr rapòrt de Save The Elephants afirma que i a una disminucion del prètz de l’evòri en China. E aquesta es pas pichona. Dos dels sieus membres, Lucy Vigne e Esmond Martin, an trobat que lo prètz de l’evòri en China a queigut prèp de dos tèrces per rapòrt al prètz de fa tres ans. “Lo prètz a queigut en març fins a 680 èuros un quilo – çò diguèron -. En genièr de 2014 lo prètz èra de mai de 1.875 èuros un quilo”.
De mai, lo govèrn chinés, qu’a decidit, fin finala, enebir lo trafec illegal d’evòri en aqueste país, a declarat aver barrat 67 obradors d’evòri a l’encòp. E encara mai auràn de barrar abans de finir l’an 2017. Aquò poiriá èsser una mai que bèla notícia pels mai de 30.000 elefants africans tuats per de braconaires cada an pr’amor de lor evòri.
Divèrsas rasons qu’ajudan a èsser (un pauc) optimista
L’organizacion Save The Elephants a balhat desparièras rasons per aquesta casuda del prètz de l’evòri en China. “La situacion economica ara es pas ges bona en China e i a mens personas que pòdon comprar productes de luxe – çò soslinhava lo rapòrt d’aquesta organizacion -. De mai, la luta que dirigís lo govèrn chinés contra la corrupcion a dissuadit fòrça gent de comprar productes d’evòri per comprar favors als oficials governamentals”.
Maugrat la notícia, Iain Douglas-Hamilton, de Save The Elefants, a volgut remembrar que lo periòde actual encara es fòrça critic per aquestes mamifèrs. “Avèm de mercejar China per las mesuras presas e maugrat que l’evòri illegal comença a finir en China, encara demora un long camin fins poder aturar definitivament la tuariá d’elefants per lor evòri. Totun, l’espèr ara pòt èsser mai grand qu’abans. L’espècia se poiriá sauvar”.
Save The Elefants a viatjat a Pequin e Shanghai e sièis vilas mai per assolidar que los obradors d’evòri avián barrat. Aqueste foguèt lo cas en totas las de Changzhou, Hanzhou, Nanjing, Shenjang, Suzhou e Tianjin.
E maugrat la brava notícia, la meteissa organizacion de proteccion animala a confirmat que China es encara uèi lo jorn lo mai grand importator d’evòri d’elefant african en tota la planeta. Cal ara veire quin serà l’impacte de l’interdiccion chinesa en lo mercat mondial de comèrci d’evòri que poiriá contunhar baissant. Una mai que planvenguda notícia per la populacion d’elefants africans e benlèu, tanben, per l’umanitat.
La Redaccion
