QUINES MESURES HÈGE UN ABELISAURE ?

Ua recenta trobalha d’un fèmur enes montanhes de Kem Kem, en Marròc, a permetut de determinar es mesures deth terapod abelisaure. Aguest dinosaure demorèc pendent eth cretacèu e enquia aué non se coneishien es sues mesures exactaments.

Se coneishie qu’es abelisaures èren carnivòrs e que dilhèu avien eth cos caperat de plomes, e qu’avie demorat pendent eth cretacèu, ara hè 95 milions d’annades e qu’ac hec en eth nòrd d’Africa, en un environament de sabanes plies d’arrius e paluns de mangròves.

“Aquerò aurie sigut un environament ideau per abelisaure pr’amor que i podie caçar tartugues, crocodils, peishi grani e tanben d’autes dinosaures – çò diguèc Alfio Alessandro Chiarenza, deth Imperial College de Londres –.“

E adara es paleontològs poden díder damb seguretat qu’un abelisaure hège 9 m de longada e pesaue enquia 2000 kg. “Es femurs poden díder as scientifics on èren es musculs e es ligaments – çò contunhèc Chiarenza – e quines mesures hègen aguesti. Pr’aquerò a estat fòrça important de hèr aguesta trobalha d’aguest fèmur en Marròc”.

Enquia auè ja s’avien trapat fossils d’abelisaure, mès adara se pòt conèisser damb precision scientifica qu’aguest terapod carnivòr ère plan gran.

“Èren un shinhau estranhs pr’amor qu’avien plomes – çò confirmèt Chiarenza ath jornau digitau PeerJ. Mès non avem nat dobte qu’ère un predador tarrible pendent era sua epòca”.

Christian Andreu