QU’EI DESCORBIDA ERA MAJOR ESPÈCIA JAMÈS CONEISHUDA D’ICTIOSAURE
Ua còla der cercaires confimec eth descorbiment dera major espècia jamès trapada d’Ictiosaure. Era naua espècia siguec nomentada Ichthyotitan severnensis e viuec pendent eth Triassic, çò ei hè 202 milions d’annades. Segontes es paleontològs poirie auer hèt ben mès de 25 mètres de longada.
De remembrar qu’es ictiosaures non sigueren dinosaures mès es sòns cosins, pr’amor que sigueren reptils marins que demorèren pendent era madeisha epòca. Son demorats coma reptils amb ua forma fòrça semblable ara des dolins e ne son demoarats centenats de fossils. Era mejana de longada des diuèrses espècies, totun, non ei major de 20 mètres.
Tanben èren reptils qu’auien es sòn petiti ena mar e que nadauen fòrça rapid. Segontes era region, sigueren tanben es majors predators der ecosistèma. “Es ictiosaures evolucionèren prumèr pendent eth començament deth Triassic, çò diguec Dean Lomax, dera Universitat de Bristol e Manchester. Sonque diuèrsi milions d’annades dempús ja arribauen as 15 mèters de longada”
Açò passèc pendent era fin deth Triassic, çò ei hè apuprètz 200 milions d’annades. Segontes es cercaires, siguec alavètz quan es ictiosaures vengueren mès grani e arribèren a mesures susprenentes, coma es dera naua espècia ara descorbida Ichthyotitan severnensis.
Ua evolucion fòrça longa
“Totun, sigueren bèri uns reptils que non demorèren entà tostemps. I auec espècies d’ictiosaures que demorèren pendent fòrça milions d’annades mès i auec tanben d’autes espècies d’ictiosaure que ja auien patit era extincion hè 200 milions d’annades, quan i auec era Grana Extincion deth Triassic-Jurassic, çò digueren es cercaires”.
Era naua espècia d’ictiosaure, era major deth mon, ei basada sus dus tròçi dera boca d’Ichthyotitan severnensis que sigueren trapades ena Formacion de Westbury Mudstone, en Anglatèrra. Segontes es mesures deth nau fossil, aguest ictiosaure aurie arribat ben as 25 mètres de longada, çò qu’ei enquia dus còps un autobús.
“Auem trapat es fossils en 2018, çò diguec Lomax. E auiem er espèr que ne poiriem trapar mès. Ara auem trapat un nau especimèn que demòstre que son un tipe d’ictiosaures qu’auien uassi susprenents e tanben ua estructura gigantassa”.
Segontes es paleontològs ei estonant descorbir que i auie ictiosaures mès grani que balenes ath torn deth Reiaume Unit, ena mar, pendent eth Triassic. Es uassi demòstren que dilhèu un dia poiràn èster trapadi mès uassi d’aguesta espècia. Eth descorbiment siguec publicat ena revista online scientifica PLoS ONE.
Era Redaccion
