”Dilhèu ara voleríem aver un milion d’amics, pr’amor qu’eth darrèr estudi scientific sus era amistat, hèt pera Universitat d’Oxford confirma que se ua persona a mes amics pòt aver mes arresisténcia ara dolor fisica. Er estudi a estat publicat en jornau Scientific Reports.
Atau, Katerina Johnson e era sua equipa d’aguesta universitat an volgut saber se aver mes amics ajudave ena creacion de mes endorfines, uns neurotranmissors que nos ajuden a aver plaser e coma que son un poderós analgesic naturau tanben nos ajuden ena luta contra era dolor. Entà hèr es estudis an agut era collaboracion de mes de 100 volontaris joens qu’an ajudat a realizar-lo.
Entà verificar quines èren es persones qu’avien mes arresisténcia ara dolor demandèren as joens de hèr quauques exercicis fisics. E poderen confirmar qu’es joens qu’avien mes arresisténcia ara dolor fisica èren es qu’avien mes amics. Era còla des exercicis non ère un aute que voler saber quina èra era tolerància des joens ara dolor.
Pr’aquerò aguest estudi a volgut soslinhar coma ei d’important aver amics e que se volem aver ua melhor salut fisica e mentau que mos cau suenhar es amics tostemp.
Segontes era autora der estudi, Katerina Johnson “avem evolucionat coma espècia pr’amor qu’avíem un entorn sociau fòrça ric mès ara, ena epòca digitau, començam a aver deficiéncies sociaus que poirien èster un des factors qu’ajuden en eth deteriorament dera nòsta salut coma societat modèrna”.
Christian Andreu
