Una espècia mai, lo caval, qu’es pro intelligenta per reconéisser l’estat emocional dels umans. Un estudi scientific, ara, o confirma. E la resulta dona d’informacion per tornar d’obrir las discussions sus se los animals pòdon sentir d’emocions e patir o pas. Un debat que fa temps qu’es obèrt e que cal contunhar pr’amor de sa importància.
E òc, pr’amor qu’es pas una discussion pichona, sens d’importància. D’un latz, avèm los aimants de l’environament e dels èsser vius. De l’autre las personas egoïstas e egotistas que dison que los animals – totes – an pas d’emocions coma los umans. Ara la sciéncia tanben vòl dire quicòm.
Un estudi qu s’es publicat al numeric Current Biology confirma doncas que los cavals domestics pòdon legir d’expressions emocionalas de las gents e las pòdon remembrar. Aquò permet los cavals d’aver d’informacion sus los umans e cossí devon agir davant una possibla menaça.
D’emocions pas umanas
La còla de cercaires qu’a fach aquel estudi vòl aital e a travèrs de las resultas del meteis, confirmar que plusors animals an d’emocions. Or, un principi d’intelligéncia que permet d’interpretar las emocions umanas. Aquò tòrna dubrir la discussion sus las emocions dels animals en tot donar ara de resultats scientifics.
“Avèm descobèrt que los cavals pòdon legir las expressions facialas umanas – çò diguèt Karen McComb, de l’Universitat de Sussex e codirectora de l’estudi -. A mai, pòdon remembrar las emocions qu’aguèron los umans abans quora los tròban aprés. Aquò provòca de reaccions d’acòrd amb las emocions umanas interpretadas. E es un fach que vòl dire que i a una reaccion segon çò qu’an vist abans”.
L’estudi s’es fach en tot mostrar fotos de personas a mai d’un caval e puèi i a agut un rescontre entre aquelas personas e los cavals pendent lo quite jorn. Los cavals reaccionèron plan o pas segon l’emocion faciala mostrada per la persona abans del rescontre. Un fach pas estudiat abans per de scientifics.
Otra aquò, l’estudi confirmèt que, maugrat èsser neutrals en divèrses moments las personas, los cavals reaccionèron de manièra desparièra segon la foto qu’avián vist abans. E se l’emocion èra estada negativa lo caval mostrèt tanplan un comportament negatiu.
Aquò arriba après divèrses estudis que se son fachs ja abans e que confirmèron que los animals percebon los fachs negatius amb l’uelh esquèrre en tot enviar d’informacion a l’emisferi drech del cervèl per la processar. En aqueste nòu estudi, los cavals aguèron una actitud o autra segon la foto qu’avián vist abans.
“Sabèm ara que los cavals son d’animals intelligents e socials mas es lo primièr còp que s’es descobèrt qu’un mamifèr pòt far aquò- çò afirmèt Leanne Proops, de l’Universitat de Portsmouth-. Totun, los cavals mostrèron pas cap d’emocion pendent lo moment que vesián la foto. Solament après, pendent lo rescontre amb aquela persona”.
La Redaccion
