Un ligre, malgrat que lo nom sembla mai lo d’un animal fantastic, es un mamifèr real qu’existís uèi lo jorn. Pasmens es cap espècia singulara pr’amor qu’es un ibrid entre un leon mascle e una tigre femèla. Lo ligre sembla mai que mai un leon gigant amb de ràias pr’amor de las sieunas mesuras; es plan màger qu’un leon mas tanben a de pèl al còl, cossí se debana en çò dels predators africans. Lo sieu nom scientific es Panthera leo × tigris. I a qualcuns cercaires que defensan qu’una femèla de tigre deuriá èsser nomenada ligresa.
Lo ligre doncas es un mamifèr qu’existís sonque pr’amor de la volontat umana. Pendent d’epòcas mai ancinas ja n’i aguèron tanben, mai que mai en Pèrsia, Índia e China e çò de mai segur tanben en Beringia – la tèrra que i aviá entre Asia e America -. Totun, las costumas dels tigres e dels leons son plan diferentas e fòrça singularas pr’amor de l’environament ont demòran e doncas calguèt d’ajuda umana per crear de ligres.
Un predator gigantàs
Lo ligre es un animal que pòt arribar aisidament als 4 mètres de longor e pesar mai de 500 Kg. Aquò fa del ligre un predator plan màger que lo leon african o asiatic e sonque pr’açò òm considèra que lo ligre es lo felin mai grand de la planeta uèi lo jorn.
Aquelas mesuras gigantassas arriban pr’amor d’un gèn pròpri. Per ansin, lo gèn qu’arrèsta la creissença de tigres e leons arriba a l’especimèn a travèrs de la maire en çò dels leons e a travèrs del paire en çò dels tigres. Lo ligre a pas aquel gèn e pr’açò patís la creissença al long de tota la sieuna vida naturala.
Pasmens, la coa e pautas son plan cuèrtas per rapòrt al cos. D’efièch un ligre vielh pòt pas sovent marchar pus pr’amor del sieu pes.
Per contra, l’ibrid invèrs, nomenat coma ligon es la barreja entre un tigre mascle e un leon femèla e la resulta n’es un mamifèr pus pichon amb una longa coa e longas pautas. Mas fa brica paur. Es pr’açò plan mens desirat qu’un ligre, cercat totjorn per de pargues zoologics mas atanben per de circs pr’amor de las sieunas mesuras estonantas.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
